ایم جی ایم اسپتال میں تقریبا پانچ گھنٹوں تک بجلی کی سپلائی متاثر۔مریضوں کو مشکلات

حیدرآباد: تلنگانہ کے ضلع ورنگل میں واقع مشہور ایم جی ایم سرکاری اسپتال میں تقریبا پانچ گھنٹوں تک بجلی کی سپلائی متاثررہی جس سے ڈاکٹرس کے ساتھ ساتھ مریضوں کو بھی شدید مشکلات کاسامنا کرناپڑا۔

ذرائع کے مطابق بجلی کی سپلائی میں کل شام تقریبا 4.30بجے رکاوٹ پیدا ہوئی۔یہ بجلی کل شب تقریبا 9.30بجے ہی بحال ہوپائی۔

اس دوران کئی وارڈس میں مریضوں کا شدید گرمی سے بُراحال تھاکیونکہ چند دنوں کے دوران گرمی کی شدت بڑھ گئی ہے۔

نرسنگ ہاسٹل کے عقبی سمت بجلی کے تاروں پرپتنگ کا مانجھا الجھ گیا جس کے نتیجہ میں بجلی کے تارٹوٹ گئے۔ان کی مرمت کے دوران بجلی کی سپلائی متاثر رہی جس سے بچوں کے وارڈس میں زیرعلاج بچے کافی متاثررہے۔

بجلی سپلائی کے متاثر ہونے کی ویڈیوز سوشیل میڈیا پر تیزی کے ساتھ وائرل ہوگئی جس پر ردعمل ظاہر کرتے ہوئے سوشیل میڈیا کا استعمال کرنے والوں نے اس واقعہ پرافسوس کا اظہار کیااورکہاکہ ایسے واقعات کے رونما ہونے پر ہنگامی طورپر بجلی کی متبادل سپلائی کو یقینی بنایاجائے تاکہ مریضوں کو دشواری کا سامنا نہ کرنا پڑے۔