فتح دروازہ میں سڑک کی توسیع، GHMC کی انہدامی کارروائی

حیدرآباد : فتح دروازہ علاقے میں گریٹر حیدرآباد میونسپل کارپوریشن (GHMC) کے ٹاؤن پلاننگ شعبہ نے مقامی پولیس کی مدد سے سڑک کی توسیع میں رکاوٹ بننے والی دکانوں کے خلاف کارروائی کی۔

ٹاؤن پلاننگ کے عہدیدار جے سی بی مشین کے ساتھ فتح دروازہ   پہنچے اور سڑک کی توسیع کے راستے میں آنے والی دکانوں اور دیگر تعمیرات کو منہدم کردیا۔ کارروائی کے دوران پولیس کی موجودگی میں انہدامی کارروائی انجام دی گئی تاکہ کسی ناخوشگوار واقعہ سے بچا جا سکے۔

حکام کے مطابق سڑک کی توسیع کے منصوبے میں رکاوٹ بننے والی تعمیرات کو ہٹایا جا رہا ہے۔ کارروائی کے باعث علاقے میں کچھ دیر کے لیے سرگرمیوں اور ٹریفک پر بھی اثر پڑا۔

مقامی ذرائع کے مطابق GHMC ٹاؤن پلاننگ اور پولیس کی مشترکہ کارروائی کے بعد سڑک کی توسیع کا کام آگے بڑھانے کی تیاری کی جا رہی ہے۔ تاہم، متاثرہ دکانداروں اور جائیداد مالکان کی جانب سے کچھ لوگوں نے اس کارروائی کے خلاف احتجاج بھی کیا۔