چھپکلی کی دُم کے ساتھ سافٹ ڈرنک! صارفین میں غصہ
نوجوانوں نے کھانے کے ساتھ ساتھ سافٹ ڈرنک بھی منگوائی۔ آدھی بوتل پینے کے بعد اُنہیں مشروب میں کچھ غیر معمولی محسوس ہوا۔ جب انہوں نے باقی مشروب کو ایک برتن میں انڈیلا، تو حیرت اور خوف سے اُن کے ہوش اُڑ گئے کیونکہ اُس میں چھپکلی کی کٹی ہوئی دُم صاف نظر آ رہی تھی۔
تلنگانہ:سنگاریڈی ضلع کے سداشیوپیٹ منڈل کے گاؤں میں واقع ‘پتنم ہائی وے ریسٹورنٹ’ میں ایک خوفناک واقعہ پیش آیا جہاں مشہور سافٹ ڈرنک کی بوتل سے چھپکلی کی دُم برآمد ہوئی۔ یہ واقعہ جمعرات کی رات اس وقت پیش آیا جب دو نوجوان قریبی گاؤں سے کھانے کے لیے مذکورہ ریسٹورنٹ آئے تھے۔
نوجوانوں نے کھانے کے ساتھ ساتھ سافٹ ڈرنک بھی منگوائی۔ آدھی بوتل پینے کے بعد اُنہیں مشروب میں کچھ غیر معمولی محسوس ہوا۔ جب انہوں نے باقی مشروب کو ایک برتن میں انڈیلا، تو حیرت اور خوف سے اُن کے ہوش اُڑ گئے کیونکہ اُس میں چھپکلی کی کٹی ہوئی دُم صاف نظر آ رہی تھی۔
فوراً ہی دونوں نوجوانوں کو قریبی اسپتال منتقل کیا گیا جہاں انہیں احتیاطی تدابیر کے تحت طبی نگرانی میں رکھا گیا۔ جمعے کی صبح جب یہ معاملہ مقامی سطح پر پھیل گیا، تو متاثرہ نوجوانوں نے فوڈ سیفٹی انسپکٹر سے باضابطہ شکایت درج کرائی۔
اس واقعے کی تصاویر اور ویڈیوز سوشل میڈیا پر تیزی سے وائرل ہو گئیں، جس پر صارفین کی جانب سے شدید غم و غصے کا اظہار کیا جا رہا ہے۔ کئی صارفین نے فوڈ سیفٹی اور صفائی کے ناقص انتظامات پر سوال اٹھائے اور ریسٹورنٹ کے خلاف سخت کارروائی کا مطالبہ کیا۔
محکمہ صحت و خوراک نے واقعے کا نوٹس لے لیا ہے اور توقع ہے کہ متعلقہ ریسٹورنٹ پر کارروائی کی جائے گی۔ ذرائع کا کہنا ہے کہ بوتل کو تجزیے کے لیے لیبارٹری بھیجا جائے گا تاکہ مکمل تحقیقات ہو سکیں کہ یہ لاپرواہی کہاں اور کیسے ہوئی
