حیدرآباد میں رات کے وقت پولیس کی سخت چیکنگ، ’چبوترا مشن‘ کے تحت نوجوانوں کی نگرانی
اگر کسی ضروری کام سے باہر نکلنا ہو تو اپنی شناخت اور باہر نکلنے کی مناسب وجہ واضح رکھنے کی ہدایت کی گئی ہے
حیدرآباد: شہر میں جرائم کی روک تھام اور رات کے اوقات میں مشتبہ سرگرمیوں پر قابو پانے کے لیے حیدرآباد سٹی پولیس کی جانب سے رات کے وقت چیکنگ اور ’مشن چبوترا‘ کو مزید مؤثر بنایا جا رہا ہے۔ پولیس ٹیمیں مختلف علاقوں میں رات دیر گئے گشت کے ساتھ سڑکوں، چبوتروں اور عوامی مقامات پر موجود افراد کی جانچ کر رہی ہیں۔
’مشن چبوترا‘ کے دوران پولیس خاص طور پر ایسے نوجوانوں پر نظر رکھتی ہے جو بغیر کسی واضح وجہ کے رات دیر گئے سڑکوں یا عوامی مقامات پر گھومتے یا بیٹھے نظر آتے ہیں۔ پولیس مشتبہ افراد سے پوچھ گچھ، شناخت کی جانچ اور ضرورت پڑنے پر تلاشی بھی لیتی ہے۔ بعض کارروائیوں میں نوجوانوں کی کونسلنگ کرکے انہیں والدین کے حوالے بھی کیا گیا ہے۔
پولیس کا کہنا ہے کہ اس کارروائی کا مقصد کسی عام شہری کو پریشان کرنا نہیں بلکہ جرائم، منشیات کی سرگرمیوں، غیر قانونی اسلحہ اور رات کے وقت ہونے والی غیرضروری نقل و حرکت کو روکنا ہے۔ ماضی میں اولڈ سٹی کے مختلف علاقوں میں بھی رات کی گشت کے ذریعے جرائم پیشہ عناصر کے خلاف کارروائیاں کی گئی ہیں۔
پولیس نے نوجوانوں اور شہریوں کو مشورہ دیا ہے کہ وہ رات دیر گئے بلا ضرورت گھومنے پھرنے سے گریز کریں اور اگر کسی ضروری کام سے باہر نکلنا ہو تو اپنی شناخت اور باہر نکلنے کی مناسب وجہ واضح رکھنے کی ہدایت کی گئی ہے۔ تاہم طبی ایمرجنسی یا دیگر حقیقی ضرورت کی صورت میں شہریوں کے باہر نکلنے پر پابندی نہیں ہے۔
