لیو اِن ریلیشن شپ پر سخت قوانین، رجسٹریشن لازمی، خلاف ورزی پر جیل اور جرمانہ تجویز

بھوپال: مدھیہ پردیش حکومت نے مجوزہ یونیفارم سول کوڈ (UCC) کے تحت لیو اِن ریلیشن شپ کے لیے سخت قواعد تجویز کیے ہیں۔ وزیر اعلیٰ ڈاکٹر موہن یادو کی زیر صدارت کابینہ نے اتوار کو اس مسودۂ قانون کی منظوری دے دی، جسے پیر سے شروع ہونے والے اسمبلی کے مانسون اجلاس میں پیش کیا جائے گا۔

مجوزہ قانون کے مطابق لیو اِن ریلیشن شپ میں رہنے والے جوڑوں کے لیے ایک ماہ کے اندر رجسٹریشن کرانا لازمی ہوگا۔ مقررہ مدت میں رجسٹریشن نہ کرانے پر تین ماہ تک قید یا 10 ہزار روپے جرمانہ یا دونوں سزائیں دی جا سکتی ہیں۔

مجوزہ UCC میں لیو اِن ریلیشن شپ سے متعلق اہم نکات

لیو اِن ریلیشن شپ شروع ہونے کے ایک ماہ کے اندر رجسٹرار کے پاس رجسٹریشن لازمی ہوگا۔

دونوں پارٹنرز کی کم از کم عمر 18 سال ہونی چاہیے، وہ پہلے سے شادی شدہ نہ ہوں اور ممنوعہ رشتوں کے دائرے میں نہ آتے ہوں۔

اگر کسی پارٹنر کی عمر 21 سال سے کم ہو تو لیو اِن ریلیشن شپ شروع ہونے اور ختم ہونے کی اطلاع اس کے والدین یا سرپرست کو دی جائے گی۔

رجسٹرار لیو اِن پارٹنرز کا ریکارڈ متعلقہ پولیس اسٹیشن کو بھی بھیجے گا۔

لیو اِن ریلیشن شپ کے دوران پیدا ہونے والے بچوں کو قانونی حیثیت حاصل ہوگی اور انہیں وراثت کے مکمل حقوق ملیں گے۔

اگر مرد پارٹنر خاتون کو چھوڑ دیتا ہے تو خاتون عدالت سے قانونی بیوی کی طرح نان و نفقہ (گزارہ بھتہ) کا مطالبہ کر سکے گی۔

ایک ماہ سے زیادہ بغیر رجسٹریشن ساتھ رہنے پر تین ماہ تک قید یا 10 ہزار روپے جرمانہ تجویز کیا گیا ہے۔

غلط معلومات فراہم کرنے پر تین ماہ تک قید اور 25 ہزار روپے جرمانہ ہو سکتا ہے۔

رجسٹرار کے نوٹس کے باوجود بیان نہ دینے پر چھ ماہ تک قید اور 25 ہزار روپے جرمانہ عائد کیا جا سکتا ہے۔

اسمبلی میں پیش ہوگا بل

مدھیہ پردیش کابینہ نے یونیفارم سول کوڈ (UCC) کے مسودۂ قانون کو منظوری دے دی ہے، جس میں لیو اِن ریلیشن شپ سمیت دیگر شہری معاملات سے متعلق نئی قانونی دفعات شامل کی گئی ہیں۔ حکومت اس بل کو ریاستی اسمبلی کے مانسون اجلاس میں پیش کرے گی، جہاں منظوری کے بعد اسے قانون کی شکل دی جا سکتی ہے۔