حیدرآباد: چیف منسٹر کے چندر شیکھر راؤ 17 فروری کو صبح 11.30 بجے سے دوپہر 12.30 بجے کے درمیان ڈاکٹر بی آر امبیڈکر تلنگانہ اسٹیٹ سکریٹریٹ کی نو تعمیر شدہ عمارت کا افتتاح کریں گے۔
افتتاح سے قبل ویدک پجاریوں کی جانب سے واستو پوجا، چنڈی یگم، سدرشن یگم اور دیگر رسومات انجام دیئے جائیں گے۔
افتتاحی تقریب میں تامل ناڈو کے وزیر اعلیٰ اور ڈی ایم کے صدر ایم کے اسٹالن، جھارکھنڈ کے وزیر اعلیٰ ہیمنت سورین، بہار کے نائب وزیر اعلیٰ تیجسوی یادو، بہار کے وزیر اعلیٰ نتیش کمار کی جانب سے جے ڈی (یو) کے قومی صدر للن سنگھ، ڈاکٹر بی آر امبیڈکر کے پوتے پرکاش امبیڈکر اور دیگر معززین شرکت کریں گے۔
بعد ازاں سکندرآباد پریڈ گراؤنڈس میں ایک بہت بڑا جلسہ عام منعقد کیا جائے گا۔
ریاستی وزیر عمارات و شوارع ویمولا پرشانت ریڈی نے منگل کو جاری کردہ ایک بیان میں بتایا کہ تمام معززین جو سکریٹریٹ کی نئی عمارت کی افتتاحی تقریب میں شرکت کریں گے، جلسہ عام میں بھی شرکت کرکے عوام سے خطاب کریں گے۔
واضح رہے کہ تلنگانہ سکریٹریٹ کی نئی پرشکوہ عمارت کی تعمیر کا کام آخری مرحلہ میں داخل ہوچکا ہے۔ اس کی تعمیر کی ذمہ دار شاپور جی پالون جی کنسٹرکشن کمپنی کے ذرائع نے بتایا کہ افتتاح کی تاریخ سے پہلے پہلے سکریٹریٹ کی شاندار عمارت حکومت کے حوالے کردی جائے گی۔
