بیمار ماں کو اسپتال چھوڑ کر فائنل کھیلنے والے کرکٹر نے ماں کی خواہش پوری کر دی
آئی پی ایل 2024 کے فائنل میں گزشتہ روز کولکتہ نائٹ رائیڈر نے سن رائزرس حیدرآباد کو شکست دیکر تیسری بار چمپئن بننے کا اعزاز حاصل کرلیا۔

کولکتہ: آئی پی ایل 2024 کے فائنل میں گزشتہ روز کولکتہ نائٹ رائیڈر نے سن رائزرس حیدرآباد کو شکست دیکر تیسری بار چمپئن بننے کا اعزاز حاصل کرلیا۔
اس موقع پر کے کے آر کی پوری ٹیم کی خوشی دیدنی تھی تاہم ان میں ایک کھلاڑی وہ بھی تھا جو اپنی شدید بیمار ماں کو اسپتال چھوڑکر فائنل کھیلنے آیا اور ٹیم کو کامیاب بناکر ماں کا خواب بھی پورا کردیا۔
یہ کرکٹر کوئی اور نہیں بلکہ چمپئن ٹیم کولکتہ نائٹ رائیڈرز کے اوپنر بلے باز رحمان اللہ گرباز ہیں جن کا تعلق افغانستان سے ہیں اور وہ فائنل کھیلنے کیلئے اپنی بیمار ماں کو افغانستان کے اسپتال میں چھوڑکر آئے۔
میچ جیتنے کے بعد رحمان اللہ گرباز نے بتایاکہ وہ اس بڑے مقابلے کیلئے اپنی بیمار ماں کو افغانستان چھوڑکر آئے تھے اور فائنل میچ سے قبل ماں سے فون پر بات بھی کی تھی۔
انہوں نے ہکاکہ میں نے والدہ سے پوچھاکہ ہندوستان سے واپسی پر آپ کیلئے کیا لیکر آؤں تو انہوں نے کہاکہ صرف ٹرافی جیت لو یہی میرے لیے سب سے بڑا تحفہ ہوگا۔
رحمان اللہ نے بتایاکہ ان کی والدہ کی طبیعت اب بہتر ہے اور فائنل میچ انہوں نے ٹی وی پر براہ راست دیکھا۔
واضح رہے کہ آئی پی ایل کے فائنل میں رحمان اللہ گرباز نے 113 رنز کے کم ہدف کے تعاقب میں 39 رنز بناکر اپنا حصہ بھی ڈالا۔ میچ کے ہیرو مچل اسٹارک رہے جنہوں نے 14 رنز دے کر دو اہم وکٹیں حاصل کیں۔