پاکستانی صدر نے یکطرفہ عام انتخابات کی تاریخ تجویز کردی

اسلام آباد: پاکستان کے صدر عارف علوی نے چیف الیکشن کمشنر کو لکھے گئے مکتوب میں یکطرفہ طورپر عام انتخابات کی تاریخ 6  نومبر تجویز کردی۔ چیف الیکشن کمشنر سلطان راجہ کے نام مکتوب میں صدر علوی نے آئین کی دفعہ 48(5)کا حوالہ دیا جو صدر پاکستان کو اختیار دیتی ہے کہ قومی اسمبلی کی تحلیل کے اندرون 90یوم عام انتخابات کی تاریخ کا تعین کردے۔

 صدر علوی‘ جیل میں بند سابق وزیراعظم عمران خان کی پارٹی پاکستان تحریک انصاف(پی ٹی آئی) کے بانی ارکان میں ایک ہیں۔ 2 دن قبل انہوں نے نگراں وزیر قانون احمد عرفان اسلم سے ملاقات کی تھی اور انتخابات پر تبادلہ خیال کیا تھا۔

الیکشن کمیشن پہلے ہی اعلان کرچکا ہے کہ وہ 30 نومبر تک حلقوں کی ازسرنو حدبندی کی تکمیل کرے گا اور اس کے بعد الیکشن کی سوچے گا۔ جنوری میں انتخابات کا امکان ہے۔