وزیراعظم کی عوام سے ورک فرام ہوم اور سونا نہ خریدنے کا بھی مشورہ۔ کورونا دور کی روایات کو دوبارہ اپنانے پر زور (ویڈیو)

نئی دہلی: مغربی ایشیا میں جاری کشیدگی اور عالمی معاشی غیر یقینی صورتحال کے درمیان وزیراعظم نریندر مودی نے ہم وطنوں سے ایک اہم اپیل کی ہے۔ وزیراعظم نے ملک کی معیشت کو سہارا دینے اور غیر ملکی زرمبادلہ بچانے کے لئے پیٹرول و ڈیزل کے کم استعمال اور کورونا دور کی روایات کو دوبارہ اپنانے پر زور دیا ہے۔

وزیراعظم نے کہا کہ کورونا کے دوران ہم نے آن لائن میٹنگز، ویڈیو کانفرنسنگ اور گھر سے کام کرنے کا جو نظام تیار کیا تھا، وقت آگیا ہے کہ اسے دوبارہ ترجیح دی جائے تاکہ سڑکوں پر گاڑیوں کا دباؤ کم ہو اور ایندھن کی بچت ہو۔

جن شہروں میں میٹر ٹرین کی سہولت موجود ہے، وہاں نجی گاڑیوں کے بجائے میٹرو کا استعمال کریں۔

اگر گاڑی سے سفر ضروری ہو تو کار پولنگ (Car-pooling) کو فروغ دیں۔

الیکٹرک گاڑیوں کے مالکان اپنی گاڑیوں کا زیادہ سے زیادہ استعمال کریں۔

تاجروں اور صنعت کاروں سے اپیل کی گئی ہے کہ وہ سامان کی ترسیل کے لیے سڑک کے بجائے ریلوے کا انتخاب کریں کیونکہ برقی ٹرینیں پیٹرول یا ڈیزل پر منحصر نہیں ہوتیں۔

وزیراعظم نے ملک کے غیر ملکی زرمبادلہ (Foreign Exchange) کو بچانے کے لیے دو فیصلے لینے کی اپیل کی۔

انہوں نے کہا کہ قوم کے مفاد میں شہری یہ عہد کریں کہ اگلے ایک سال تک، چاہے گھر میں کوئی بھی تقریب ہو، وہ سونا نہیں خریدیں گے۔

مودی نے متوسط طبقے سے اپیل کی کہ وہ کم از کم ایک سال کے لیے بیرونی ممالک کے دورے اور ڈیسٹینیشن ویڈنگز کو ملتوی کر دیں اور اس کے بجائے ہندوستان کے اندر ہی سیاحتی مقامات کا رخ کریں۔

وزیراعظم نے واضح کیا کہ یوکرین جنگ اور عالمی بحران کی وجہ سے دنیا بھر میں ایندھن، خوراک اور کھاد کی قیمتیں حد سے تجاوز کر گئی ہیں۔ چونکہ ہندوستان اپنی ضرورت کا بڑا حصہ دوسرے ممالک سے درآمد کرتا ہے، اس لیے غیر ملکی زرمبادلہ بچانا اب حب الوطنی کا تقاضا ہے۔

"آج جو بحران ہے اس میں ہمیں غیر ملکی کرنسی بچانے پر زور دینا ہوگا۔ پیٹرول اور ڈیزل بچا کر ہم ملک کی معیشت کو مضبوط کر سکتے ہیں۔” — وزیراعظم نریندر مودی