مسلسل اموات سے خوفزدہ گاؤں والوں کا انوکھا قدم، پوری بستی خالی کرکے جنگل منتقل (ویڈیو)

حیدرآباد: تلنگانہ کے ضلع میں واقع جممیکنٹ منڈل کے گاؤں کیشورا پور میں ایک غیر معمولی واقعہ سامنے آیا ہے، جہاں مسلسل اموات سے خوفزدہ ہو کر گاؤں والوں نے پورا گاؤں عارضی طور پر خالی کر دیا۔

مقامی افراد کے مطابق، گاؤں میں پے در پے اموات ہونے کی وجہ سے خوف و ہراس پھیل گیا تھا۔ اس صورتحال کے پیشِ نظر ایک پنڈت (پروہت) کے مشورے پر تمام گاؤں والے آج کے دن گاؤں چھوڑ کر قریبی جنگل میں “کیڈو ونتل” (بدشگونی دور کرنے کی رسم) ادا کرنے کے لیے روانہ ہو گئے۔

گاؤں والوں کا ماننا ہے کہ اس رسم کے فیصلے کے بعد اموات کا سلسلہ رک گیا ہے، جس کے باعث انہوں نے اس روایت پر عمل کرنے کا فیصلہ کیا۔

یہ واقعہ علاقے میں موضوعِ بحث بنا ہوا ہے، جہاں ایک طرف کچھ لوگ اسے عقیدے سے جوڑ رہے ہیں، تو دوسری جانب بعض افراد اسے محض توہم پرستی قرار دے رہے ہیں۔ حکام کی جانب سے اس معاملے پر ابھی تک کوئی باضابطہ ردِعمل سامنے نہیں آیا ہے۔