میدک واقعہ کی ہر زاویہ سے تحقیقات کی جائے، محمود علی کی ہدایت
تلنگانہ پولیس‘ریاست بھر میں تمام مذاہب کے لوگوں کے ساتھ یکساں سلوک کرتی ہے. وہ کسی خاص مذہب یا طبقہ سے جانبداری نہیں کرتی۔ان خیالات کا اظہار ریاستی وزیر داخلہ محمد محمود علی نے عراق کے شہر بغداد سے پریس نوٹ جاری کرتے ہوئے کیا۔

حیدرآباد: تلنگانہ پولیس‘ریاست بھر میں تمام مذاہب کے لوگوں کے ساتھ یکساں سلوک کرتی ہے. وہ کسی خاص مذہب یا طبقہ سے جانبداری نہیں کرتی۔ان خیالات کا اظہار ریاستی وزیر داخلہ محمد محمود علی نے عراق کے شہر بغداد سے پریس نوٹ جاری کرتے ہوئے کیا۔
انہوں نے میدک ضلع کے نرساپور میں پیش آئے واقعہ پر افسوس ظاہر کرتے ہوئے متعلقہ پولیس افسران سے تفصیلات دریافت کیں۔جس پر پولیس افسران نے کیس کے حقائق بتاتے ہوئے کہا کہ گورالا لنگم نامی شخص جو گیس ڈلیوری کا کام کرتا ہے نے 7 مئی کو محمد عمران احمد کے ہوٹل پر گیس سلنڈر پہنچایا اور خالی سلنڈر واپس کرنے کو کہا تو محمد عمران احمد نے کہا کہ دو دن بعد خالی سلنڈر حوالے کرے گا، اس دوران دونوں میں ہاتھا پائی ہوئی۔
گورالا لنگم نے پولیس میں شکایت کی جس پر کارروائی کرتے ہوئے نرساپور پولیس اسٹیشن کے پولیس افسر نے مقدمہ درج کیا اور تحقیقات کا آغاز کیا۔
گورالا لنگم نے خاموشی اختیار نہ کرتے ہوئے اپنے نو ساتھیوں کو ساتھ لے کر محمد عمران احمد کے گھر پہنچا، ان لوگوں نے غیر قانونی طور پر محمد عمران کے گھر میں گھس کر اسے مارا پیٹا، عمران کی والدہ محترمہ فاطمہ بیگم اور ان کی بہن محترمہ آسیہ انجم، عمران کو بچانے کی کوشش کی جس کے نتیجے میں گورالا لنگم اور ان کے ساتھیوں نے عمران کی والدہ اور بہن کو مارا پیٹا اور دھکا دیا۔
فاطمہ بیگم نے نرساپور پولیس اسٹیشن میں شکایت کی۔جس پر نرساپور پولیس نے شکایت درج کی اور تحقیقات شروع کردی ہے۔ نرساپور پولیس نے اس کیس میں ملوث سبھی افراد کو سیکشن 41-(A) Cr.PC کے تحت نوٹس جاری کیا ہے۔
وزیر داخلہ محمد محمود علی نے تمام تفصیلات کی سماعت کے بعد ڈی جی پی، ضلع ایس پی اور متعلقہ پولیس افسران کو ہدایات جاری کی ہیں کہ وہ اس کیس کی ہر زاویہ سے منصفانہ تحقیق کریں اورخاطیوں کے خلاف سخت قانونی کارروائی کریں۔
انہوں نے عوام سے اپیل کی کہ کسی بھی معاملہ کی حقیقت جانے بغیر قیاس آرائیاں نہ کریں اور نہ ہی افواہ پھیلائیں۔وزیر موصوف نے کہا کہ تلنگانہ میں لا اینڈ آرڈر پرامن ہے، غیر ضروری اور بے بنیاد افواہوں سے اس کو بگاڑنے کی کوشش نہ کریں۔
انہوں نے یہ بھی کہا کہ الیکشن کے قریب مخصوص فرقہ پرست لوگ سماج میں بگاڑ پیدا کرنے کی کوشش میں لگے رہتے ہیں۔لہٰذا عوام کو ان کے بہکاوے سے بچنے کی کوشش کرنی چاہیئے تاکہ ریاست میں امن و امان برقرار رہے۔