پونے کے ایک جوڑے نے 9 ماہ میں منالی سے کشمیر تک پیدل سفر کیا
اس جوڑے نے بتایا کہ ان نو ماہ کے دوران ہم نے پہاڑوں کا مشاہدہ کیا جس دوران یہ محسوس ہوا کہ ان پہاڑوں کی دیکھ ریکھ کی خاطر بہت کچھ کرنے کی ضرورت ہے۔
سری نگر: مہاراشٹرہ کے پونے شہر سے تعلق رکھنے والے ایک جوڑے نے منالی سے کشمیر کا پیدل سفر نو ماہ کے طویل عرصے میں مکمل کیا اور یہ جوڑا سری نگر پہنچ گیا۔ سری نگرپہنچنے پر میاں بیوی نے بتایا کہ منالی سے ہوتے ہوئے لداخ براستہ سری نگر پہنچے جس دوران انہیں لوگوں کا کافی پیار ملا ۔
انہوں نے کہا کہ پہاڑوں کی حالت زار دیکھ اُن کا دل کافی رنجیدہ ہوا ہے ۔ نکھل او راُس کی اہلیہ پرینیتی نے لالچوک سری نگر میں نامہ نگاروں سے بات چیت کے دوران بتایا کہ ہم سال 2019 میں کشمیر کی سیر وتفریح پر آئے اور واپسی پر فیصلہ کیا کہ اب منالی سے پیدل سری نگر تک مسافت طے کریں گے۔
انہوں نے کہا کہ نوکری کو خیر باد کہہ کر نو ماہ قبل منالی سے سری نگر کی طرف پیدل سفر شروع کیا جس دوران ہم نے دیہی اور پہاڑی علاقوں میں راتیں گزاریں۔ اُن کے مطابق کشمیر کے کلچر اور ثقافت کو پوری طرح سے سمجھنے کی خاطر ہی نو ماہ تک پیدل سفر کیا تاکہ یہاں کے قدرتی نظاروں سے لطف اندوز ہو سکے۔
موصوف جوڑے نے بتایا کہ ہم یومیہ 20 سے 25 کلومیٹر کا پیدل سفر کرتے تھے اور رات کسی گاؤں میں گزارتے تھے۔ انہوں نے کہا جہاں پر بھی پڑاؤ کیا وہاں کے لوگوں نے کافی پیار دیا ۔
اس جوڑے نے بتایا کہ ان نو ماہ کے دوران ہم نے پہاڑوں کا مشاہدہ کیا جس دوران یہ محسوس ہوا کہ ان پہاڑوں کی دیکھ ریکھ کی خاطر بہت کچھ کرنے کی ضرورت ہے۔ اُن کا مزید کہنا تھا کہ واقعی کشمیر جنت کا ایک ٹکڑا ہے یہاں کے پہاڑوں کو دیکھنے اور دیہی علاقوں کے لوگوں سے ملاقات کرکے بہت اچھا لگا۔
