ملاپور انڈسٹریل علاقہ کی ایک پینٹ فیکٹری میں بھیانک آگ لگ گئی (ویڈیو وائرل)

حیدرآباد: میڑچل کے ملاپور انڈسٹریل علاقہ میں ہفتہ کی شام ایک پینٹ فیکٹری میں زبردست آگ بھڑک اٹھی۔ مقامی افراد نے فوری طور پر فائر بریگیڈ اور پولیس کو اطلاع دی، جس کے بعد فائر بریگیڈ کی 4 گاڑیاں جائے حادثہ پر پہنچ کر آگ بجھانے میں مصروف ہیں۔

آگ لگنے کے وقت چونکہ فیکٹری میں چھٹی کا دن تھا، اس لیے کوئی کارکن موجود نہیں تھا، جس کی وجہ سے بڑا حادثہ ہونے سے بچ گیا۔ آگ کی شدت کے باعث مقامی افراد خوفزدہ ہیں اور اپنے گھروں سے باہر نکلنے پر مجبور ہو گئے ہیں۔ گاڑھا دھواں فضا میں بلند ہو رہا ہے، جس نے ماحول کو دھندلا دیا ہے۔

اب تک آگ لگنے کی وجوہات کا پتہ نہیں چل سکا ہے۔ حکام نے علاقے کو محفوظ بنانے کے لیے احتیاطی تدابیر اختیار کر لی ہیں اور آگ پر قابو پانے کی کوششیں جاری ہیں۔