افسران کے فرضی دستخط اور دھمکی کے معاملے میں سابق خاتون پولیس سب انسپکٹر قصوروار قرار

نئی دہلی: قومی دارالحکومت کی دوارکا عدالت نے دہلی پولیس کی سابق سب انسپکٹر کویتا ماتھر کو سینئر پولیس افسران کے فرضی دستخط کرنے اور ایک اعلیٰ افسر کو دھمکی آمیز ایس ایم ایس بھیجنے کا قصوروار قرار دیا ہے۔

یہ معاملہ سال 2015 میں کیے گئے جرائم سے متعلق ہے، جب کویتا پالم گاؤں پولیس اسٹیشن میں تعینات تھیں۔ عدالت کے فیصلے کے مطابق، تفتیشی افسر کے طور پر کام کرتے ہوئے کویتا نے پالم گاؤں تھانے کی کئی ایف آئی آرز کی حتمی رپورٹ یا چارج شیٹ پر اس وقت کے اسسٹنٹ کمشنر آف پولیس ایم ہرش وردھن کے جعلی دستخط کیے تھے۔

ان پر ایف آئی آر نمبر 224/14 اور 276/14 کی حتمی رپورٹ پر اس وقت کے تھانہ انچارج نیوتی ایم کشیپ کے دستخط بھی جعلی طریقے سے کرنے اور بعد میں ان دستاویزات کو متعلقہ عدالت میں پیش کرنے کا الزام تھا۔

اس کے علاوہ 23 جولائی 2015 کو کویتا نے اپنے موبائل فون سے اے سی پی ہرش وردھن کے سرکاری موبائل نمبر پر ایک ایس ایم ایس بھیجا تھا، جس میں لکھا تھا کہ سر، میں نے بہت کوشش کی کہ میں تمام باتوں کا سامنا کروں، لیکن یہ میرے لیے بہت مشکل رہا، میں کسی کا سامنا نہیں کر پا رہی ہوں، میں نے آپ کے سائن کر کے کوئی معاملہ منسوخ نہیں کروایا، سب لوگ مجھے عجیب طریقے سے دیکھ رہے ہیں،

میں عدالت کے سامنے نہیں جا پا رہی، میرا سارا کریئر آپ کی ایف آئی آر نے ختم کر دیا، میں خودکشی کر رہی ہوں۔ عدالت نے تسلیم کیا کہ یہ پیغام ڈرانے کے ارادے سے دی گئی ‘مجرمانہ دھمکی’ تھی، جس کا مقصد افسر کو خوفزدہ کرنا اور انہیں معاملے کی پیروی کرنے سے روکنا تھا۔

عدالت نے یہ بھی پایا کہ جب انسپکٹر مینا یادو نے ملزمہ سے فرضی دستخطوں کے بارے میں پوچھ گچھ کی، تو اس نے چارج شیٹ کا آخری صفحہ پھاڑ دیا، جس پر تفتیشی افسر، ایس ایچ او اور اے سی پی کے دستخط تھے، اور ساتھ ہی کہا کہ جو ہو سکتا ہے وہ کر لو اور جو کرنا ہے کر لینا۔

ملزمہ نے خود کو بے قصور بتایا اور جھوٹے مقدمے میں پھنسانے کا دعویٰ کیا، تاہم اس نے دفاع کی جانب سے کوئی ثبوت پیش نہ کرنے کا انتخاب کیا۔ عدالت نے کہا کہ استغاثہ نے بلا شبہ اپنا کیس ثابت کر دیا ہے اور کویتا کو تمام الزامات میں مجرم قرار دیا، اب اس معاملے میں سزا سنانے کے لیے الگ سماعت مقرر کی گئی ہے۔