چنڈی گڑھ میں چار روزہ ہیٹ ویو اور طوفان کا الرٹ جاری

چنڈی گڑھ: چنڈی گڑھ اور پنجاب میں آئندہ چار روز کے لیے ہیٹ ویو اور طوفان کا الرٹ جاری کیا گیا ہے۔ اپریل کے آخری ہفتے میں درجہ حرارت معمول سے زیادہ ریکارڈ کیا جا رہا ہے، جس کی وجہ سے شہریوں کو شدید گرمی کا سامنا ہے۔

محکمہ موسمیات کے مطابق، اگلے چار روز تک گرم ہواؤں کے ساتھ ساتھ تیز آندھی اور طوفان آنے کا امکان ہے۔ محکمہ نے شہریوں کو خصوصی احتیاط برتنے کا مشورہ دیا ہے۔ خاص طور پر دوپہر 12 بجے سے شام 4 بجے کے درمیان گھر سے باہر نکلنے سے گریز کرنے کو کہا گیا ہے، کیونکہ اس دوران درجہ حرارت عروج پر ہوتا ہے ۔

ڈاکٹروں کا کہنا ہے کہ جسم میں پانی کی کمی (ڈی ہائیڈریشن) سے بچنے کے لیے زیادہ سے زیادہ مائع اشیاء کا استعمال کریں اور بچوں، بوڑھوں اور بیمار افراد کا خاص خیال رکھیں۔

محکمہ موسمیات نے یہ اشارہ بھی دیا ہے کہ آنے والے دنوں میں درجہ حرارت میں مزید اضافہ ہو سکتا ہے، اس لیے عوام سے محفوظ رہنے کی اپیل کی گئی ہے۔