خواتین کے بعد بزرگوں کو بھی مفت بس سفر ؟ تلنگانہ حکومت کا اہم منصوبہ زیر غور
بتایا جارہا ہے کہ بزرگ شہریوں کی جانب سے موصول ہونے والی درخواستوں اور خاص طور پر دیہی علاقوں میں عوامی ٹرانسپورٹ پر ان کے انحصار کو دیکھتے ہوئے حکومت اس تجویز کے امکانات اور مختلف پہلوؤں کا جائزہ لے رہی ہے۔
حیدرآباد: تلنگانہ حکومت خواتین کے لیے مہالکشمی اسکیم کے تحت مفت بس سفر کی سہولت فراہم کرنے کے بعد اب بزرگ شہریوں کو بھی مفت سفر کی سہولت دینے کے امکان پر غور کررہی ہے۔ بتایا جارہا ہے کہ بزرگ شہریوں کی جانب سے موصول ہونے والی درخواستوں اور خاص طور پر دیہی علاقوں میں عوامی ٹرانسپورٹ پر ان کے انحصار کو دیکھتے ہوئے حکومت اس تجویز کے امکانات اور مختلف پہلوؤں کا جائزہ لے رہی ہے۔
حکومت کی جانب سے تجویز پر غور ایسے وقت میں کیا جارہا ہے جب ریاست میں خواتین کو مہالکشمی اسکیم کے تحت سرکاری بسوں میں مفت سفر کی سہولت حاصل ہے۔ اسی طرز پر اگر بزرگ شہریوں کے لیے بھی مفت سفر کی سہولت شروع کی جاتی ہے تو اس سے بڑی تعداد میں سینئر سٹیزنس کو فائدہ پہنچنے کی توقع ہے، خاص طور پر ان افراد کو جو علاج، سرکاری کاموں، بازاروں اور دیگر ضروریات کے لیے پبلک ٹرانسپورٹ پر انحصار کرتے ہیں۔
آندھرا پردیش میں 60 سال یا اس سے زیادہ عمر کے بزرگ شہریوں کو اے سی سروسز سمیت تمام بسوں کے ٹکٹ پر 25 فیصد رعایت دی جارہی ہے۔ اس کے برخلاف تلنگانہ میں بزرگ شہریوں کو مکمل طور پر مفت سفر کی سہولت دینے کے امکان پر غور کیا جارہا ہے۔ تاہم اس سلسلے میں کئی اہم امور پر واضح فیصلہ کرنا ہوگا۔
سب سے اہم سوال یہ ہے کہ اگر یہ اسکیم نافذ کی جاتی ہے تو کیا اس کا اطلاق پلے ویلوگو سے لے کر ایکسپریس سروسز تک تمام اقسام کی بسوں پر ہوگا یا صرف مخصوص سروسز تک محدود رہے گا۔ اسی طرح یہ بھی طے کرنا ہوگا کہ بزرگ شہریوں کو دوسرے اضلاع کا سفر کرنے والی بسوں میں بھی مفت سفر کی سہولت حاصل ہوگی یا نہیں۔
ذرائع کے مطابق حکومت کو اس اسکیم کے مالی پہلو پر بھی غور کرنا ہوگا۔ مہالکشمی اسکیم کے تحت خواتین کے مفت سفر کی وجہ سے تلنگانہ اسٹیٹ روڈ ٹرانسپورٹ کارپوریشن پر پہلے ہی مالی بوجھ ہے۔ ایسے میں بزرگ شہریوں کے لیے بھی مفت سفر شروع کیے جانے کی صورت میں آر ٹی سی پر اضافی مالی ذمہ داری عائد ہوسکتی ہے۔
اس اضافی اخراجات کی تلافی کس طرح کی جائے گی اور حکومت کو اس مقصد کے لیے کتنی رقم مختص کرنا ہوگی، یہ اہم معاملات ہوں گے۔ خواتین کے مفت سفر کی طرح بزرگ شہریوں کے مفت سفر کے لیے بھی حکومت کی جانب سے آر ٹی سی کو الگ سے مالی تعاون فراہم کرنا پڑ سکتا ہے۔
حکومت کی جانب سے فی الحال اس تجویز کے مختلف پہلوؤں کا جائزہ لیا جارہا ہے۔ بزرگ شہریوں کی عمر کی حد، بس سروسز کا دائرہ کار، دوسرے اضلاع کے سفر اور مالی اخراجات سمیت دیگر امور پر فیصلہ ہونے کے بعد ہی اس اسکیم کے بارے میں واضح رہنما اصول سامنے آسکتے ہیں۔ فی الحال بزرگ شہریوں کے لیے مفت بس سفر کا فیصلہ حتمی نہیں ہوا ہے۔
