پرانے شہر کے اہم چوراہے اندھیرے میں، حادثات کا خطرہ لاحق

حیدرآباد: حیدرآباد کے  پرانے شہر میں واقع مصروف ترین چادر گھاٹ ایکس روڈ اور چنچل گوڑہ ایکس روڈ جنکشن پر رات کے وقت مرکزی اسٹریٹ لائٹس بند ہونے کے باعث شہریوں اور گاڑی چلانے والوں کو شدید مشکلات کا سامنا ہے۔

اطلاعات کے مطابق ان علاقوں میں اس وقت سڑک کی تعمیراتی سرگرمیاں جاری ہیں، جس کی وجہ سے پہلے ہی آمد و رفت متاثر ہے۔ ایسے میں اسٹریٹ لائٹس بند ہونے سے رات کے وقت گڑھے، ڈائیورژن اور ٹریفک سائن بورڈ واضح نظر نہیں آتے، جس سے حادثات کا خطرہ کئی گنا بڑھ گیا ہے۔

مقامی افراد کا کہنا ہے کہ تاریکی کے باعث دو پہیہ گاڑی سواروں، کار ڈرائیوروں اور پیدل چلنے والوں کو خوف و ہراس کے عالم میں سفر کرنا پڑ رہا ہے، جبکہ کسی بھی وقت بڑا حادثہ پیش آ سکتا ہے۔

شہریوں نے متعلقہ حکام سے مطالبہ کیا ہے کہ کسی بھی ناخوشگوار واقعے سے قبل فوری طور پر ان اہم جنکشنوں کی اسٹریٹ لائٹس بحال کی جائیں تاکہ عوام کی جان و مال کا تحفظ یقینی بنایا جا سکے۔