تیل فیکٹری میں زبردست آگ، کروڑوں روپے کے نقصان کا خدشہ

الور :   راجستھان میں الور کے متسیہ صنعتی علاقے میں ہفتہ کی صبح سرسوں کا تیل پیک کرنے والی الور سالویکس فیکٹری میں آگ لگنے سے افراتفری مچ گئی۔

موصولہ اطلاعات کے مطابق صبح تقریباً چھ بجے لگی آگ نے دیکھتے ہی دیکھتے ہولناک شکل اختیار کرلی۔ حالات اتنے سنگین ہو گئے کہ صبح نو بجے تک بھی آگ پر مکمل طور پر قابو نہیں پایا جا سکا۔ فیکٹری سے مسلسل دھوئیں کا غبار اٹھ رہا ہے اور فائر برگیڈ کی ٹیمیں آگ بجھانے میں مصروف ہیں۔

آگ کی ہولناکی کو دیکھتے ہوئے انتظامیہ اور فائر برگیڈ نے احتیاط کے طور پر آس پاس کی فیکٹریوں کو خالی کرالیا ہے۔ وہاں کام کر رہے ملازمین کو باہر نکال دیا گیا ہے اور آس پاس کی صنعتی اکائیوں کا کام بھی بند کرا دیا گیا ہے۔

ذرائع نے بتایا کہ فیکٹری کے ارد گرد رکاوٹیں لگا کر راستہ مکمل طور پر بند کر دیا گیا ہے۔ کسی بھی شخص کو آگ کی سمت جانے کی اجازت نہیں دی جا رہی ہے۔ سکیورٹی کے پیش نظر پورے علاقے میں نقل و حرکت روک دی گئی ہے۔

فائر برگیڈ کے افسر امت مینا نے بتایا کہ آگ کی اطلاع صبح تقریباً چھ بجے ملی تھی۔ اس کے بعد فائر برگیڈ کی گاڑیاں موقع پر بھیجی گئیں۔ آگ کی خطرناک صورتحال کو دیکھتے ہوئے مسلسل فائر ٹینڈرز موقع پر بلائے گئے ہیں۔ فائر فائٹرز مسلسل پانی کی بوچھاڑ کر کے آگ پر قابو پانے کی کوشش کر رہے ہیں۔ تیل اور پیکنگ کا سامان ہونے کی وجہ سے آگ تیزی سے پھیلنے کے خدشے کے پیش نظر خصوصی احتیاط برتی جا رہی ہے۔

فیکٹری کے مالک پون جین چودھری نے بتایا کہ شارٹ سرکٹ سے آگ لگنے کی بات سامنے آئی ہے۔ فیکٹری میں لگنے والی آگ سے فی الحال تقریباً پانچ کروڑ روپے سے زائد کے نقصان کا تخمینہ لگایا جا رہا ہے۔ آگ نے فیکٹری کے بڑے حصے کو اپنی زد میں لے لیا ہے۔ تاہم اصل نقصان کا اندازہ آگ مکمل طور پر بجھنے کے بعد ہی ہو سکے گا۔