جماعتِ اسلامی ہند گریٹر حیدرآباد ویمنز ونگ کے زیرِ اہتمام صحافیوں اور این جی اوز کا اجلاس

حیدرآباد: جماعتِ اسلامی ہند (جے آئی ایچ) گریٹر حیدرآباد ویمنز ونگ کی جانب سے ہفتہ کے روز مہدی پٹنم میں واقع ریاستی دفتر میں صحافیوں اور این جی اوز کا ایک خصوصی اجلاس منعقد کیا گیا، جس میں خواتین صحافیوں اور مختلف سماجی تنظیموں کی نمائندہ خواتین نے شرکت کی۔ اجلاس کا مقصد سماجی بہبود اور کمیونٹی کی ترقی کے لیے باہمی تعاون کو فروغ دینا تھا۔

پروگرام کا آغاز اُمِّ عمارہ اور سیدہ اِفرا کی جانب سے تلاوتِ کلامِ پاک اور اس کے اردو و انگریزی ترجمے سے ہوا۔ شعبۂ تعلقاتِ عامہ (PR) کی کور کمیٹی رکن محترمہ عائشہ صدیقہ نے شرکاء کا خیرمقدم کیا، جبکہ محترمہ افشاں خلیل نے ترانہ پیش کیا۔

اپنے افتتاحی خطاب میں جماعتِ اسلامی ہند گریٹر حیدرآباد ویمنز ونگ کی سٹی سیکریٹری محترمہ اسماء زرزاری نے جماعتِ اسلامی ہند کے وژن اور سرگرمیوں کا تعارف پیش کیا اور میڈیا کے نمائندوں اور سماجی تنظیموں کے درمیان مثبت اور تعمیری روابط کی اہمیت پر زور دیا۔

اس موقع پر ایک تعارفی نشست بھی منعقد ہوئی جس میں شرکاء نے اپنی اپنی تنظیموں اور جاری سماجی سرگرمیوں کے بارے میں معلومات پیش کیں۔

اجلاس کی نمایاں سرگرمی “سماجی مسائل کے حل میں میڈیا اور این جی اوز کا کردار” کے موضوع پر منعقدہ پینل ڈسکشن تھی، جس کی نظامت معروف صحافی و مدیرہ محترمہ راسیہ نعیم ہاشمی نے کی۔

پینل میں محترمہ شیبا مینائی (صحافی و سماجی کارکن)، ڈاکٹر رافعہ نوشین (کونسلر، مائی چوائس فاؤنڈیشن)، محترمہ ثمینہ (ایڈووکیٹ، صحافی و مصنفہ) اور محترمہ نشاط حسن مرزا (بانی، قل ویلفیئر سوسائٹی) نے شرکت کی۔

مقررین نے ذمہ دار صحافت، سماجی شعور کی بیداری اور کمیونٹی کی فلاح و بہبود کے لیے باہمی تعاون کی اہمیت پر روشنی ڈالی۔

اس موقع پر جماعتِ اسلامی ہند ویمنز ونگ کی ریاستی سیکریٹری محترمہ خدیجہ مہوین نے اپنے خطاب میں میڈیا، این جی اوز اور سماجی تنظیموں کے درمیان مسلسل تعاون کی ضرورت پر زور دیا تاکہ معاشرے کی بہتر تعمیر و ترقی ممکن ہو سکے۔

پینل کے شرکاء کو یادگاری تحائف (مومنٹوز) پیش کیے گئے، جبکہ مہمانوں کو ہدیہ میگزین کا خصوصی عید ایڈیشن اور منتخب اسلامی لٹریچر بھی پیش کیا گیا۔

پروگرام کا اختتام جماعتِ اسلامی ہند گریٹر حیدرآباد ویمنز ونگ کی پی آر انچارج محترمہ عرشیہ مدثر کے اظہارِ تشکر (ووٹ آف تھینکس) پر ہوا-