دہشت گردوں اور ان کے حامیوں کو ناقابل تصور سزا دی جائے گی: وزیر اعظم مودی

مدھوبنی (پی ٹی آئی) وزیراعظم نریندر مودی نے جمعرات کے روز اعلان کیا کہ پہلگام کے قاتلوں کا دنیا کے ہر کونے تک پیچھا کیا جائے گا اورو عدہ کیا کہ ان کی شناخت کی جائے گی، پتہ چلایا جائے گا اور ہردہشت گرد اور ان کے حامیوں کو سزا دی جائے گی۔

پہلگام میں 22 اپریل کے حملہ کے بعد اپنی پہلی تقریر میں وزیراعظم نے اس حملہ کے پس پردہ دہشت گردوں کو پناہ دینے کا عہد کیا اور کہا کہ دہشت گردی کی وجہ سے ہندوستان کی روح کبھی نہیں ٹوٹے گی۔ مودی نے کچھ دیر کے لئے انگریزی میں خطاب کیا اور کہا دوستو‘ آج میں بہار کی سرزمین سے پوری دنیا سے کہتا ہوں کہ ہندوستان ہر دہشت گرد اور اس کے حامیوں کا پتہ چلائے گا اور انہیں سزا دے گا۔

ہم دنیا کے ہر کونے تک ان کا پیچھا کریں گے۔ دہشت گردی کو یقینا سزا دی جائے گی۔ انہوں نے ایک سخت پیام میں کہا کہ انصاف کو یقینی بنانے کی ہر ممکن کوشش کی جائے گی۔ سارا ملک اس عہد پر قائم ہے۔ انسانیت میں یقین رکھنے والے ہمارے ساتھ ہیں۔

میں مختلف ممالک کے عوام اور ان کے قائدین کا شکریہ ادا کرتا ہوں جنہوں نے اس مشکل گھڑی میں ہمارا ساتھ دیا۔ پاکستان کا نام لئے بغیر اسے ایک پیام دیتے ہوئے مودی نے کہا کہ وہ واضح طور پر یہ کہنا چاہتے ہیں کہ جن دہشت گردوں نے یہ حملہ کیا اور جنہوں نے سازش رچی‘انہیں ناقابل تصور سزا دی جائے گی۔ وزیراعظم نے کہا کہ 140 کروڑ ہندوستانیوں کی قوت ِ ارادی دہشت گردی کے سرپرستوں کی کمر توڑ دے گی۔

مہلوکین اور ان کے ارکانِ خاندان سے اظہار تعزیت کرتے ہوئے انہوں نے کہا کہ ملک بھر کے شہری کشمیر میں 22 اپریل کو 26بے قصور عام شہریوں کے ہلاک کئے جانے کے وحشیانہ انداز پر سوگ منارہے ہیں۔ پورا ملک ان کے خاندانوں کے ساتھ کھڑا ہے۔ مودی اور شہ نشین پر موجود دیگر قائدین اور ہجوم نے وزیراعظم کی تقریر شروع ہونے سے پہلے مہلوکین کو خراجِ عقیدت پیش کرنے خاموشی منائی۔

مودی نے کہا کہ لوگ اپنے بیٹوں، بھائیوں اور شوہروں کو کھوچکے ہیں۔ مہلوکین کا تعلق ملک کے مختلف حصوں سے تھا چاہے وہ بنگال ہو، کرناٹک ہو، مہاراشٹرا ہو، گجرات، اوڈیشہ ہو یا بہار۔ انہوں نے کہا کہ ہمارا دکھ اور برہمی‘ کارگل سے کنیا کماری تک پھیلے ہوئے ہیں۔ امن و سلامتی تیز رفتار ترقی کے لئے انتہائی ضروری ہے۔