ٹرین حادثہ، اے پی کی 10 ایمبولنس گاڑیاں اوڈیشہ پہنچ گئیں

حیدرآباد: آندھراپردیش کی دس ایمبولنس گاڑیاں اوڈیشہ کے بالاسور بھیجی گئیں جہاں پر پیش آئے ٹرین حادثہ میں 288افراد ہلاک اور تقریبا ایک ہزارزخمی ہوگئے۔

سریکلم ضلع کے ڈسٹرکٹ منیجر 108ایمبولنس سرویسس نذیر نے کہا کہ وزیراعلی جگن موہن ریڈی نے ہدایت دی ہے کہ ایمبولنس گاڑیاں بھیجی جائیں تاکہ زخمیوں کو مختلف اسپتالوں کو منتقل کرنے میں مدد مل سکے۔یہ ایمبولنس گاڑیاں طبی آلات اور ڈاکٹرس سے لیس ہیں۔

 ان کے ذریعہ مریضوں کو بالاسور اور دیگر قریبی ٹاونس میں واقع اسپتالوں میں پہنچانے میں مدد مل سکے گی۔انہوں نے کہاکہ وزیراعلی نے ہدایت دی کہ پڑوسی ریاست میں پیش آئے اس خطرناک حادثہ کے زخمیوں کی مدد کو یقینی بنایاجائے اور ان کو اسپتال منتقل کیاجائے۔انہوں نے کہاکہ جملہ 10ایمبولنس گاڑیاں کو پڑوسی ریاست کو بھیجاگیا ہے۔