تلنگانہ میں بی جے پی کئی اسمبلی حلقوں میں آگے

حیدرآباد: مرکزی وزیر و تلنگانہ بی جے پی کے صدر کشن ریڈی نے الزام لگایا کہ کانگریس ریاست میں اقتدار میں آنے کے لیے ناقابل عمل وعدے کررہی ہے۔

انہوں نے کہا کہ بھارتیہ جنتا پارٹی کو تمام طبقات کی حمایت مل رہی ہے۔ انہوں نے کہا کہ کمزور طبقات اور درج فہرست قبائل سے تعلق رکھنے والے افراد خاص طور پر بی جے پی کی حمایت کرتے ہیں۔

کشن ریڈی نے نامپلی میں بی جے پی کے ریاستی دفتر میں میڈیا سے بات کرتے ہوئے دعوی کیا کہ تلنگانہ میں بی جے پی کئی اسمبلی حلقوں میں آگے ہے۔

رائے دہندے خاموش انقلاب کے طورپر بی آرایس کے خلاف ووٹ دیں گے۔انہوں نے کہا کہ ریاست کے کئی ایسے حلقے ہیں جہاں پر مقامی عوام ریاست کی حکمران جماعت بی آرایس کے ارکان اسمبلی اور ان کی تشہیری گاڑیوں کو مواضعات میں داخل ہونے سے روک رہے ہیں اور وعدوں کی عدم تکمیل پر ان پر برہمی کااظہا ربھی کیاجارہا ہے۔دلت بندھو، قرض معافی، بی سی بندھو،، دلت کو وزیراعلی بنانے کے وعدے پورے نہیں کئے گئے۔

انہوں نے زودیتے ہوئے کہاکہ رائے دہندے بی جے پی کے منشور پر مثبت ردعمل ظاہر کررہے ہیں۔ ریاست میں بی سی کو وزیراعلی بنانے کے وعدے نے انہیں اپنی طرف راغب کیا۔ نوجوان نریندر مودی کے ساتھ کھڑے ہیں۔ عوام کا ماننا ہے کہ بی جے پی ایک ایسی پارٹی ہے جو اگر کچھ کہتی ہے تو اپنی بات پر قائم رہتی ہے۔