بے زبان کے ساتھ حیوانیت، سی سی ٹی وی ویڈیو وائرل

ممبئی (مالوانی) – ممبئی کے مالوانی علاقہ سے ایک دل دہلا دینے والا واقعہ سامنے آیا ہے، جس نے انسانیت کو شرمندہ کر دیا۔ ایک شخص نے ایک بے زبان بلی کو 9ویں منزل سے نیچے پھینک کر بے رحمی سے ہلاک کر دیا۔ یہ پوری واردات عمارت میں لگے سی سی ٹی وی کیمرے میں قید ہو گئی اور اب یہ ویڈیو سوشل میڈیا پر تیزی سے وائرل ہو رہی ہے۔

سی سی ٹی وی ویڈیو میں صاف دیکھا جا سکتا ہے کہ ایک بلی عمارت کی کھڑکی کے پاس رکھے جوتوں کے ریک پر کھڑی ہے۔ کچھ ہی لمحوں بعد ایک شخص وہاں آتا ہے، اُس کے ہاتھ میں ایک بیگ ہوتا ہے۔ وہ پہلے بلی کے قریب جاتا ہے، کچھ دیر بعد پلٹتا ہے، بلی کو اُٹھاتا ہے اور اُسے کھڑکی سے نیچے پھینک دیتا ہے۔

بدقسمتی سے، بلی سیدھی نیچے ایک دھات کی چادر پر گرتی ہے اور موقع پر ہی اس کی موت واقع ہو جاتی ہے۔

سی سی ٹی وی فوٹیج کے منظر عام پر آنے کے بعد، مقامی افراد نے فوری طور پر ملزم کی شناخت کر لی۔ اس شخص کا نام قاسم سیّد بتایا گیا ہے، جو کہ اس عمارت میں ایک فلیٹ کا مالک ہے۔ سوشل میڈیا پر ایک اور ویڈیو وائرل ہو رہی ہے، جس میں ایک مقامی شہری، بلی کو پھینکے جانے کی جگہ دکھا رہا ہے اور قاسم سیّد کے خلاف سخت کارروائی کا مطالبہ کر رہا ہے۔ مذکورہ شخص نے پولیس انچارج کو لکھا گیا ایک تحریری شکایت نامہ بھی کیمرے پر دکھایا، جس میں قاسم کے خلاف قانونی کارروائی کی اپیل کی گئی ہے۔

یہ واقعہ صرف ایک جانور پر ظلم نہیں، بلکہ پوری انسانیت کے لیے ایک سوالیہ نشان ہے۔ بلی کے ساتھ ہوئی بے رحمی پر عوام کا ردعمل اس بات کی علامت ہے کہ معاشرہ اب ایسے جرائم کو برداشت کرنے کو تیار نہیں۔ عوام انصاف کی امید کیے ہوئے ہیں۔