تلنگانہ میں 104 امیدواروں کے خلاف فوجداری مقدمات درج

حیدرآباد: تلنگانہ میں پارلیمنٹ انتخابات میں قسمت آزمائی کر رہے 524 امیدواروں میں سے تقریباً20فیصد یعنی 104 امیدواروں کے خلاف فوجداری مقدمات درج ہیں۔

سولہ فیصد امیدواروں یعنی 85 امیدواروں کے خلاف سنگین نوعیت کے فوجداری مقدمات درج ہیں۔ تقریباً 21 فیصد امیدوار، یعنی 109 امیدوار کروڑ پتی ہیں۔

لوک سبھا انتخابات 2024 (مرحلہ IV) کے لئے امیدواروں کے انتخاب میں سیاسی جماعتوں پر سپریم کورٹ کی ہدایات کا کوئی اثر نہیں ہوا ہے کیونکہ انہوں نے پھر سے ایسے امیدواروں کو ٹکٹ دینے کی اپنی پرانی روایت کو برقرار رکھا ہے جن کے خلاف فوجداری مقدمات درج ہیں۔

سپریم کورٹ نے 13 فروری 2020 کو اپنی ہدایات میں سیاسی جماعتوں سے خاص طور پر کہا تھا کہ وہ اس طرح کے انتخاب کی وجوہات بتائیں اور وضاحت کریں کہ مجرمانہ سرگرمیوں سے دور لوگوں کو امیدوار کے طور پر کھڑا کیوں نہیں کیا جا سکتا۔