چیف منسٹر پنجاب کی بیٹی کو امریکہ میں جان سے مار دینے کی دھمکی

نئی دہلی: چیف منسٹر پنجاب بھگونت مان کی لڑکی کو امریکہ میں مبینہ طور پر جان سے مار ڈالنے کی دھمکیاں موصول ہونے پر اظہارِ تشویش کرتے ہوئے دہلی کمیشن برائے خواتین (ڈی سی ڈبلیو) کی سربراہ سواتی مالیوال نے آج امریکہ میں ہندوستانی سفارت خانہ سے اپیل کی کہ وہ اس لڑکی کی حفاظت کو یقینی بنائیں۔

چیف منسٹر پنجاب کی دختر کو مبینہ طور پر موافق خالصتان عناصر کی جانب سے دھمکی آمیز کالس موصول ہوئی ہیں۔ مان کی مطلقہ بیوی اندر پریت کور گریوال نے جو اپنی 21 سالہ دختر سیرت کور اور 18 سالہ لڑکے دلشان کے ساتھ امریکہ میں رہتی ہیں، سوشل میڈیا کے ذریعہ اس واقعہ کی توثیق کی۔

انہوں نے فیس بک پر لکھا کہ خالصتان کے حامیوں نے ان کی دختر کو فون پر جان سے مار ڈالنے کی دھمکی دی ہے اور اسے گالی گلوج بھی کی۔ انھوں نے لکھا کہ کیا آپ اس طرح دھمکیاں دیتے ہوئے اور بچوں کو گالی گلوج کرتے ہوئے خالصتان حاصل کرنے والے ہیں۔ ایسے لوگ سکھ مت پر دھبہ ہیں۔