فیملی سرٹیفکیٹ سے سرکاری کام ہوں گے مزید آسان، تلنگانہ حکومت کی نئی پیشکش

حیدرآباد: حکومتِ تلنگانہ نے ریاست بھر میں فیملی سرٹیفکیٹ (Family Certificate) کی سہولت کا آغاز کر دیا ہے۔ اب یہ سرٹیفکیٹ تمام تحصیلدار (ایم آر او) دفاتر اور می سیوا (MeeSeva) مراکز پر حاصل کیا جا سکتا ہے۔

نائب وزیر اعلیٰ بھٹی وکرمارکا نے کہا کہ اس سرٹیفکیٹ کا مقصد ہر خاندان کو ایک مستند دستاویز فراہم کرنا ہے، جس میں خاندان کے تمام افراد کی تصدیق شدہ معلومات ایک ہی جگہ درج ہوں۔ انہوں نے بتایا کہ جب بھی کسی سرکاری محکمہ، ادارے یا کسی دوسرے نظام کو خاندانی معلومات درکار ہوں، یہ سرٹیفکیٹ ایک قابلِ قبول اور مستند دستاویز کے طور پر استعمال کیا جا سکے گا۔

انہوں نے مزید بتایا کہ جاری اسپیشل انٹینسیو ریویژن (SIR) ووٹر اندراج مہم کے دوران بھی فیملی سرٹیفکیٹ ایک قابلِ قبول دستاویز کے طور پر تسلیم کیا جائے گا۔

حکومت کے مطابق یہ سرٹیفکیٹ پہلے سے موجود اور تصدیق شدہ سرکاری ریکارڈ، جیسے راشن کارڈ، آروگیہ شری (Aarogyasri)، فائن رائس اسکیم اور دیگر فلاحی منصوبوں کے اعداد و شمار کی بنیاد پر تیار کیا گیا ہے۔

حکومت نے عوام سے اپیل کی ہے کہ اگر انہیں اپنے خاندان کی سرکاری اور مستند معلومات پر مشتمل دستاویز درکار ہو تو وہ اپنے قریبی تحصیلدار (ایم آر او) دفتر یا می سیوا مرکز سے فیملی سرٹیفکیٹ حاصل کریں۔