باغ امبرپیٹ کے بتکماکنٹہ کا حائیڈرا نے کیا دورہ، عوام میں خوف وہراس

حیدرآباد: باغ اَمبرپیٹ میں واقع بتکما کُنٹہ کا حائیڈرا کے کمشنر اے وی رنگا ناتھ نے چہارشنبہ کے روز دورہ کیا۔ انہوں نے اس موقع پر جھیل پر قبضے کے مسئلہ پر مقامی عوام سے گفتگو کی۔ جب مقامی افراد نے یہ سوال کیا کہ آیا ان کے مکانات منہدم کر دیے جائیں گے، تو کمشنر نے واضح کیا کہ مکانات یا رہائشی علاقوں کو نقصان نہیں پہنچایا جائے گا۔

کمشنر نے مزید کہا کہ بتکما کُنٹہ کی بحالی کا کام دو مہینوں میں مکمل کر لیا جائے گا اور یہ کام موجودہ پانچ ایکڑ رقبے تک محدود رہے گا، جس سے رہائشی علاقوں کو کوئی نقصان نہیں پہنچے گا۔

 اس دوران کانگریس کے سینئر قائد وی ایچ نے بتایا کہ ماضی میں بھی بتکما کُنٹہ پر قبضہ کی شکایات کی گئی تھیں۔ احتیاطی تدابیر کے طور پر علاقے میں بڑی تعداد میں پولیس کو تعینات کیا گیا ہے تاکہ کسی ناخوشگوار واقعہ سے بچا جا سکے۔