عمران خان کے خلاف فوجی عدالت میں مقدمہ چلنے کا امکان

اسلام آباد: پاکستان کے وزیردفاع خواجہ آصف نے کہا ہے کہ امکان ہے کہ سابق وزیراعظم عمران خان پر 9مئی کے واقعات کے سلسلہ میں فوجی عدالت میں مقدمہ چل سکتا ہے۔

 دی ایکسپریس ٹریبیون نے خواجہ آصف کے حوالہ سے اطلاع دی کہ آئندہ دنوں میں اگر ثبوت مل گیاتو 70 سالہ عمران خان پر فوجی عدالت میں مقدمہ چلے گا۔ انہوں نے توثیق کی کہ  9مئی کے حملوں کے سلسلہ میں پاکستان تحریک انصاف کے سربراہ کے خلاف ابھی تک کوئی کیس درج نہیں ہوا۔

خواجہ آصف نے کہا کہ امکان ہے کہ عمران خان پر فوجی عدالت میں مقدمہ چلے گا۔ چند دن قبل وزیرداخلہ راناثناء اللہ نے کہاتھا کہ عمران خان پر فوجی عدالت میں مقدمہ چلے گا کیونکہ 9 مئی کے واقعات کے منصوبہ ساز سابق وزیراعظم ہی ہیں۔

 شہبازشریف کابینہ نے فیصلہ کیاتھا کہ 9مئی کو فوجی تنصیبات پر حملہ کرنے والے مظاہرین کے خلاف آرمی ایکٹ اور سرکاری رازقانون کے تحت مقدمات چلیں گے۔ وزراء باربارکہہ چکے ہیں کہ نئی فوجی عدالتیں قائم نہیں ہوں گی‘ پہلے سے موجود عدالتوں میں ہی مقدمہ چلیں گے۔