ایران معاہدے کے 30 روز بعد آبنائے ہرمز کھول سکتا ہے، برطانوی میڈیا کا دعویٰ

تہران: برطانوی خبر ایجنسی نے دعویٰ کیا ہے کہ ایران، امریکہ کے ساتھ ممکنہ معاہدے کے 30 روز بعد آبنائے ہرمز کھولنے کا ارادہ رکھتا ہے۔

برطانوی خبر ایجنسی کے مطابق یہ دعویٰ جاپان کے معاشی اخبار ’’نیکے‘‘ کی رپورٹ کے حوالے سے کیا گیا ہے۔

رپورٹ میں کہا گیا ہے کہ تہران ممکنہ معاہدے کے بعد مرحلہ وار انداز میں آبنائے ہرمز میں بحری آمد و رفت بحال کرنے پر غور کر رہا ہے۔

اس سے قبل ایرانی فوج کے ترجمان بریگیڈیئر جنرل ابراہیم ذوالفقاری نے کہا تھا کہ کسی بھی معاہدے کی صورت میں بھی آبنائے ہرمز مکمل طور پر ایرانی انتظامیہ کے کنٹرول میں رہے گی۔

انہوں نے واضح کیا تھا کہ آبنائے ہرمز سے گزرنے والے بحری راستوں، اوقات کار اور میری ٹائم لائسنسوں کے اجرا کا اختیار ایرانی حکام کے پاس ہی رہے گا۔