ایرانی وزیر خارجہ عراقچی نے اقوام متحدہ کے اجلاس میں اسرائیلی حملوں کی مذمت کی

جنیوا: ایران کے وزیر خارجہ سید عباس عراقچی نے جمعہ کو یہاں اقوام متحدہ کے اجلاس میں اپنے ملک پر اسرائیلی حملوں کی مذمت کی۔

اقوام متحدہ کی انسانی حقوق کونسل (یو این ایچ آر سی) کے 59ویں اجلاس سے خطاب کرتے ہوئے مسٹر عراقچی نے کہا کہ اسرائیل نے ایران کے خلاف "بلا اشتعال جارحیت” کی ہے۔

مسٹر عراقچی برطانیہ، فرانس اور جرمنی کے اپنے ہم منصبوں کے ساتھ ملاقات کے لیے جنیوا میں ہیں، جس میں یورپی یونین کے نمائندے بھی شامل ہیں۔

مسٹر عراقچی نے یو این ایچ آر سی کے اجلاس میں اپنی تقریر میں بتایا کہ اسرائیل "فلسطین میں خوفناک نسل کشی” کر رہا ہے، اور اب وہ ایران کے خلاف جارحیت کر رہا ہے۔ انہوں نے کہا کہ اسرائیل جنگی جرائم اور انسانیت کے خلاف جرائم کر رہا ہے۔

انہوں نے کہا کہ بین الاقوامی جوہری توانائی ایجنسی (آئی اے ای اے) کی نگرانی میں ہونے کے باوجود ایران کی جوہری تنصیبات کو بھی نشانہ بنایا گیا ہے۔ انہوں نے کہا کہ اس طرح کے حملے نہ صرف بین الاقوامی قانون کی خلاف ورزی ہیں، بلکہ ان سے سنگین تابکار رساؤ بھی ہو سکتا ہے، جس کے ماحول اور عوامی صحت پر تباہ کن نتائج ہو سکتے ہیں۔