مہاراشٹر: کووڈ کے 84 نئے کیسز، ممبئی، پنے اور ناسک میں سب سے زیادہ فعال کیسز

ممبئی: مہاراشٹر میں کووڈ-19 کے 84 نئے کیسز درج ہوئے ہیں، جس کے بعد ریاست میں اس سال اب تک رجسٹرڈ کیسز کی مجموعی تعداد بڑھ کر 681 ہو گئی ہے، جبکہ فعال کیسز کی تعداد 467 ہے۔

ریاست کے محکمہ صحت عامہ کے مطابق، جمعہ کو سامنے آنے والے کیسز میں سب سے زیادہ تعداد ممبئی، پونے اور ناسک سے رپورٹ ہوئی ہے۔

محکمہ صحت کی جانب سے جاری کردہ بیان کے مطابق، زیادہ تر مریضوں میں ہلکی علامات پائی گئی ہیں اور عوام کو گھبرانے کی ضرورت نہیں ہے۔ نئے کیسز میں ممبئی میں 32، تھانے ضلع میں 2، تھانے میونسپل کارپوریشن حدود میں 14، نوی ممبئی میں 1، کلیان ڈومبیولی میونسپل کارپوریشن میں 1، رائے گڑھ ضلع میں 2، پنویل میں 1، ناسک شہر میں 1، پونے ضلع میں 1، پونے میونسپل کارپوریشن میں 19، پمپری چنچواڑ میونسپل کارپوریشن میں 3، ساتہ پور ضلع میونسپل کارپوریشن اور کولہاپور میں 1، جبکہ سانگلی میونسپل کارپوریشن حدود میں 3 کیسز سامنے آئے ہیں۔

ریاست میں اس وقت 467 ایکٹو کیسز ہیں، جبکہ ممبئی میں جنوری 2025 سے اب تک کل 411 کیسز رپورٹ ہو چکے ہیں۔ محکمہ صحت کے مطابق، تمام تشخیص شدہ کیسز ہلکی نوعیت کے ہیں۔

جنوری سے اب تک ریاست میں 10,324 کووڈ-19 ٹیسٹ کیے گئے، جن میں سے 681 مثبت آئے۔

ملک گیر سطح پر 30 مئی 2025 تک ہندوستان میں 2,710 فعال کووڈ-19 کیسز ہیں۔ کیرالہ 1,147 کیسز کے ساتھ سرفہرست ہے، اس کے بعد مہاراشٹر (424) ، دہلی (294) اور گجرات (223) ہیں۔

کیرالہ میں 227 نئے انفیکشن، مغربی بنگال میں 59 نئے کیسز، دہلی میں 56 نئے کیسز اور راجستھان میں 54 نئے کیسز رپورٹ ہوئے ہیں، جبکہ راجستھان میں ایک موت بھی ریکارڈ کی گئی ہے۔ وزیر صحت نے اس وائرس کی فلو جیسی قسم کا ذکر کرتے ہوئے کم پھیلاؤ اور احتیاطی تدابیر جاری رکھنے کا مشورہ دیا ہے۔