شیفالی زری والا کی موت پر ممبئی پولیس کی تفتیش، فرانزک ٹیم متحرک

ممبئی: اداکارہ شیفالی زری والا کے اچانک انتقال نے بالی ووڈ دنیا کو گہرے غم میں مبتلا کر دیا ہے۔ 42 سالہ شیفالی کو گزشتہ شب سینے میں تکلیف کی شکایت پر فوری طور پر ممبئی کے بیلیو ملٹی اسپیشلٹی اسپتال لے جایا گیا، جہاں ڈاکٹروں نے انہیں مردہ قرار دے دیا۔

ابتدائی رپورٹ میں موت کی ممکنہ وجہ دل کا دورہ بتائی گئی ہے، تاہم ابھی تک سرکاری سطح پر اس کی تصدیق نہیں ہوئی۔ لاش کو پوسٹ مارٹم کے لیے کوپر اسپتال منتقل کر دیا گیا ہے۔ ہفتہ کو ممبئی پولیس کی ایک ٹیم اور فرانزک ماہرین ان کی رہائش گاہ پر پہنچے تاکہ موت کے اسباب کی باریکی سے تفتیش کی جا سکے۔

پولیس نے بیان میں واضح کیا ہے کہ موت کی وجہ فی الحال غیر واضح ہے۔ اہلکاروں کے مطابق اداکارہ اپنے شوہر کے ساتھ ممبئی کے اندھیری علاقے میں واقع ‘گولڈن ریز’ نامی عمارت میں مقیم تھیں۔ ان کے شوہر اور دیگر اہل خانہ انہیں رات دیر گئے اسپتال لے کر پہنچے، جہاں ڈاکٹروں نے ان کی موت کی تصدیق کی۔

عمارت میں تعینات سیکورٹی گارڈ نے بتایا کہ رات تقریباً 10 یا 10:15 بجے ایک گاڑی بڑی تیزی سے عمارت سے نکلی، جیسے کسی ہنگامی صورتحال میں ہو۔ گاڑی کے سیاہ شیشوں کی وجہ سے یہ واضح نہ ہو سکا کہ اندر کون تھا، البتہ گارڈ نے بتایا کہ انہوں نے شیفالی کو آخری بار اپنے شوہر کے ساتھ سیر کرتے دیکھا تھا اور اس وقت وہ صحت مند نظر آ رہی تھیں۔

شیفالی کا تعلق احمد آباد، گجرات سے تھا، جہاں وہ 15 دسمبر 1982 کو پیدا ہوئیں۔ انہوں نے متعدد میوزک ویڈیوز، فلموں اور ٹی وی شوز میں کام کیا۔ وہ ‘نچ بلیے’ کے سیزن میں اپنے شوہر پیراگ تیاگی کے ساتھ شریک ہوئیں، جس سے انہوں نے 2015 میں شادی کی تھی۔

اس سے قبل 2004 میں ان کی پہلی شادی موسیقار ہرمیت سنگھ سے ہوئی تھی، جو 2009 میں طلاق پر ختم ہوئی۔ شیفالی کو ‘کانٹا لگا’ گانے سے زبردست شہرت ملی اور وہ ‘بگ باس 13’ میں بھی مقابلہ کرنے والوں میں شامل رہیں۔ پولیس کا کہنا ہے کہ تفتیش جاری ہے اور تمام پہلوؤں کو سامنے رکھ کر تحقیقات کی جا رہی ہیں۔