دوستوں کے چیلنج پر حالت نشہ میں تالاب میں چھلانگ لگانے والے نوجوان کی موت (ویڈیو وائرل)

حیدرآباد:دوستوں کی جانب سے چیلنج کرنے پر ایک نوجوان تالاب میں کود پڑا جس کے نتیجہ میں اس کی جان چلی گئی۔اس واقعہ کاویڈیوسوشیل میڈیا کے مختلف پلیٹ فارمس پر تیزی کے ساتھ وائرل ہوگیا ہے۔یہ واقعہ کب کا ہے معلوم نہ ہوسکا۔ اس واقعہ کا آج اس وقت انکشاف ہوا جب یہ ویڈیو وائرل ہوا۔

 شہرحیدرآباد کے بنڈلہ گوڑہ سے تعلق رکھنے والے چارنوجوان کرناٹک کے کملاپور، چٹگوپہ علاقہ گئے ہوئے تھے۔بتایاجاتا ہے کہ ان میں سے بعض نے شراب پی تھی۔اس ویڈیو میں دیکھاجاسکتا ہے کہ اس نوجوان کو جو تیراکی سے واقف نہیں تھا اس کے دوستوں کی جانب سے چیلنج کیاگیا جس پر وہ تالاب میں کود پڑا۔

اس نوجوان کی شناخت ساجد کے طورپر کی گئی ہے۔اس واقعہ کی ویڈیو لینے والے ایک نوجوان نے اپنے ساتھیوں سے ساجد کو بچانے کی درخواست کی تاہم وہ اس میں کامیاب نہیں ہوسکے جس کے نتیجہ میں ساجد غرق ہوگیا۔مقامی پولیس نے اس سلسلہ میں ایک معاملہ درج کرکے جانچ شروع کردی۔