چنڈی گڑھ بی جے پی ہیڈکوارٹر کے باہر دھماکہ معاملے میں دو مشتبہ افراد گرفتار

چنڈی گڑھ: چنڈی گڑھ کے سیکٹر-37 میں واقع پنجاب بھارتیہ جنتا پارٹی (بی جے پی) ہیڈکوارٹر کے باہر ہوئے دھماکے کے معاملے میں پنجاب پولیس نے روپ نگر (روپڑ) سے دو مشتبہ افراد کو گرفتار کیا ہے۔

گرفتار ملزمان کی شناخت امن سنگھ عرف بھولو اور گرتیج سنگھ کے طور پر ہوئی ہے۔ بتایا جا رہا ہے کہ دونوں ضلع روپ نگر کے تھانہ سٹی مورنڈا کے تحت گاؤں رتن گڑھ کے رہنے والے ہیں۔

یہ کارروائی پنجاب پولیس کی سی آئی اے ٹیم نے انجام دی۔ وہیں موہالی پولیس کی اینٹی گینگسٹر ٹاسک فورس (اے جی ٹی ایف) کے ایک اہلکار نے بتایا کہ معاملہ ابھی زیر تفتیش ہے اور آپریشن جاری ہے، اس لیے فی الحال مزید معلومات شیئر نہیں کی جا سکتیں۔

انہوں نے کہا کہ گرفتاریاں ٹھوس ثبوتوں کی بنیاد پر کی گئی ہیں اور دونوں ملزمان سے پوچھ گچھ جاری ہے۔

ذرائع کے مطابق اس حملے میں جی ایچ ڈی-2 پی ہینڈ گرنیڈ کا استعمال کیا گیا، جس کے بارے میں بتایا جا رہا ہے کہ وہ پاکستان کا تیار کردہ ہے۔ یہ گرینیڈ دھماکے کے بعد پانچ سے دس میٹر کے دائرے میں انتہائی مہلک ہوتا ہے، جبکہ اس کے چھرے 20 سے 25 میٹر تک پھیل سکتے ہیں، جس سے آس پاس موجود لوگوں کو شدید خطرہ ہو سکتا ہے۔

واقعے کے بعد سامنے آئیں دو ویڈیوز میں مشتبہ افراد کی سرگرمیاں قید ہوئی ہیں۔ ایک ویڈیو میں حملے سے چند منٹ پہلے دونوں کو بی جے پی دفتر کے پاس ایک دوسرے دفتر کے باہر کھڑے دیکھا گیا، جبکہ دوسری ویڈیو میں دھماکے کے بعد دونوں کو سڑک عبور کر کے بھاگتے ہوئے دیکھا گیا۔

پولیس معاملے کی گہرائی سے جانچ میں مصروف ہے۔