وقف قانون کے بعد بی جے پی اب دیگر مذاہب کی زمینوں پر نظر رکھے ہوئے ہے: ادھو ٹھاکرے

ممبئی: شیو سینا (یو بی ٹی) کے سربراہ ادھو ٹھاکرے نے اتوار کے روز بی جے پی پر سنگین الزام عائد کرتے ہوئے کہا کہ وقف قانون کو نافذ کرنے کے بعد اب بی جے پی اپنے "دوستوں” کو فائدہ پہنچانے کے لیے عیسائیوں، جینوں، بدھوں اور حتیٰ کہ ہندو مندروں کی زمین پر بھی نظریں جمائے ہوئے ہے۔

 اسی ضمن میں این سی پی (ایس پی) کے سینئر لیڈر جتیندر اوہاڑ نے بھی راشٹریہ سویم سیوک سنگھ (آر ایس ایس) کے ترجمان "آرگنائزر” میں شائع ایک مضمون کا حوالہ دیتے ہوئے ایسا ہی دعویٰ کیا۔

ادھو ٹھاکرے نے اپنی سابق اتحادی جماعت بی جے پی کو مشورہ دیا کہ وہ اپنے 45 ویں یوم تاسیس کے موقع پر ایسے رویے کا مظاہرہ کرے جیسا کہ بھگوان رام نے کیا تھا۔

ٹھاکرے نے کہا، "اگلا قدم (وقف قانون کے بعد) عیسائیوں، جینوں، بدھوں اور ہندو مندروں کی زمین پر نظریں رکھنا ہوگا۔ وہ اپنے دوستوں کو یہ قیمتی زمینیں دیں گے۔ انہیں کسی بھی برادری سے کوئی محبت نہیں ہے۔”

یاد رہے کہ صدر جمہوریہ دروپدی مرمو نے ہفتہ کے روز وقف (ترمیمی) بل 2025 کو منظوری دے دی ہے، جسے گزشتہ دنوں پارلیمنٹ میں منظور کیا گیا تھا۔ حکومت کا کہنا ہے کہ یہ قانون ملک میں مسلم مذہبی اوقاف سے متعلق اصلاحات لائے گا۔

ادھو ٹھاکرے نے "آرگنائزر” کے ایک بظاہر غیر مطبوعہ مضمون کا حوالہ دیتے ہوئے کہا، "انہوں نے اب سب کے لیے یہ عام کر دیا ہے، سب کو اپنی آنکھیں کھولنی چاہئیں۔”

ٹھاکرے یہ بات شیو سنچار سینا کے آغاز کے موقع پر کہہ رہے تھے، جو پارٹی کا نیا آئی ٹی اور کمیونیکیشن ونگ ہے۔جب ان سے پوچھا گیا کہ کیا شیو سینا (یو بی ٹی) بھی وقف بل کے خلاف دیگر اپوزیشن جماعتوں کی طرح عدالت سے رجوع کرے گی، تو انہوں نے اس کا جواب نفی میں دیا۔

پارٹی کے سینئر لیڈر سنجے راوت نے کہا کہ مستقبل میں تمام وقف اراضی بی جے پی کے "صنعت پرست دوستوں” کے قبضے میں چلی جائے گی۔ انہوں نے کہا کہ بی جے پی کو غربت پر بات نہیں کرنی چاہئے، اور یہ دعویٰ بھی کیا کہ گزشتہ اسمبلی انتخابات میں بی جے پی نے جتنی رقم خرچ کی وہ مہاراشٹر کے بجٹ کے برابر تھی۔ اسی دوران، این سی پی (ایس پی) کے رہنما جتیندر اوہاڑ نے دعویٰ کیا کہ مسلمانوں کے بعد اب بی جے پی کا نشانہ عیسائی برادری ہے۔

تھانے کے کلوا-ممبرا حلقہ کے رکن اسمبلی نے ایکس پر پوسٹ کرتے ہوئے کہا کہ آر ایس ایس کے ترجمان نے یہ دعویٰ کیا ہے کہ وقف بورڈ نہیں بلکہ کیتھولک چرچ آف انڈیا ملک کا سب سے بڑا زمیندار ہے۔ اوہاڑ کے مطابق، مضمون کا عنوان تھا: ’’بھارت میں کس کے پاس زیادہ زمین ہے؟ کیتھولک چرچ بمقابلہ وقف بورڈ مباحثہ‘‘ اور یہ 3 اپریل کو شائع ہوا تھا۔انہوں نے کہا کہ مضمون میں لکھا گیا ہے کہ برسوں سے یہ عام خیال تھا کہ وقف بورڈ ہندوستان میں حکومت کے بعد دوسرا سب سے بڑا زمیندار ہے، لیکن اصل اعداد و شمار اس خیال کی تردید کرتے ہیں۔

اوہاڑ نے دعویٰ کیا کہ مضمون میں کیتھولک چرچ آف انڈیا کو ملک کا سب سے بڑا غیر سرکاری زمیندار بتایا گیا ہے، جس کے پاس پورے ملک میں وسیع اراضی موجود ہے۔ ان کے مطابق، چرچ کے پاس تقریباً 17.29 کروڑ ایکڑ (7 کروڑ ہیکٹر) زمین ہے۔

انہوں نے کہا کہ مضمون میں بتایا گیا ہے کہ چرچ کی زیادہ تر زمین انگریزوں کے دورِ حکومت میں حاصل کی گئی تھی۔ 1927 میں، برطانوی حکومت نے انڈین چرچ ایکٹ منظور کیا، جس کے تحت چرچ کو بڑے پیمانے پر زمین عطا کی گئی۔

اوہاڑ کے مطابق، مضمون میں اس بات پر بھی سوال اٹھایا گیا ہے کہ آیا چرچ کی کچھ زمین مشتبہ ذرائع سے حاصل کی گئی تھی۔انہوں نے کہا کہ یہ مضمون اس لیے اہمیت رکھتا ہے کیونکہ یہ اس وقت شائع ہوا ہے جب پارلیمنٹ میں منظور شدہ وقف بل پر شدید بحث چھڑ گئی ہے۔ اوہاڑ نے مزید کہا کہ آرگنائزر نے 1950 میں ہندوستان کے آئین اور قومی پرچم کی بھی مخالفت کی تھی۔