پنجاب اور چنڈی گڑھ میں گرمی پھر بڑھی، سات اضلاع میں آندھی – بارش کا یلو الرٹ

چنڈی گڑھ: پنجاب اور چنڈی گڑھ میں ایک بار پھر گرمی شدت اختیار کر گئی ہے۔ درجہ حرارت میں تقریباً 2 ڈگری سیلسیس کا اضافہ ہوا ہے اور آنے والے دنوں میں لوگوں کو لو کا سامنا کرنا پڑ سکتا ہے۔ موسمیاتی مرکز، چنڈی گڑھ نے آج سات اضلاع میں آندھی -طوفان، گرج چمک اورتیز ہواؤں کے لیے یلوالرٹ جاری کیا ہے۔

محکمہ موسمیات کے مطابق پٹھان کوٹ، گورداسپور، ہوشیار پور، فاضلکا، مکتسر، بھٹنڈہ اور مانسا میں 40 سے 50 کلومیٹر فی گھنٹہ کی رفتار سے تیز ہوائیں چلنے کا امکان ہے۔ ہلکی سے درمیانی بارش بھی متوقع ہے۔ بدھ کی شام بھی موسم میں اچانک تبدیلی دیکھی گئی تھی۔ تیز آندھی اور کچھ وقت تک ہلکی بارش سے لوگوں کو پریشانیوں کا سامنا کرنا پڑا اور کئی مقامات پر نقصان بھی ہوا۔

محکمہ موسمیات نے آئندہ دو روز تک موسم خشک رہنے کی پیش گوئی کی ہے۔ اس کے بعد 17 مئی سے لو چلنے کا امکان ہے۔ شمالی ہندوستان کے اوپر سائیکلون گردش برقرار ہے۔ 15 مئی سے ایک نیا ویسٹرن ڈسٹربنس کے فعال ہونے کی توقع ہے، جس کے اثر سے شمال مغربی ہندوستان میں بادل چھانے، بارش ہونے اور تیز ہواؤوں کا امکان ہے۔ مزید برآں 16 مئی کے آس پاس جنوب مغربی مانسون کے آگے بڑھنے کے لیے بھی حالات سازگار ہوتے جا رہے ہیں۔

انتظامیہ اور محکمہ صحت نے لوگوں کو چوکس رہنے کا مشورہ دیا ہے۔ حکام کا کہنا ہے کہ لوگ اپنے گھروں سے باہر نکلنے سے گریز کریں جب تک کہ بالکل ضروری نہ ہو۔ اسپتالوں میں ہیٹ اسٹروک کے کیسز میں مسلسل اضافہ دیکھا جا رہا ہے۔ اس کے علاوہ پیٹ سے متعلق امراض کے مریض بھی بڑی تعداد میں آرہے ہیں۔

ماہرین صحت نے لوگوں کو مشورہ دیا ہے کہ کٹی سبزیاں اور پھل احتیاط سے کھائیں۔ انہوں نے لوگوں سے پینے کے پانی کی صفائی پر بھی خصوصی توجہ دینے کی اپیل کی ہے۔ خود کو گرمی سے بچانے کے لیے وافر مقدار میں پانی اور سیال چیزیں پینے کا مشورہ دیا گیا۔ ماہرین کے مطابق پانی کی کمی پیٹ سے متعلق مسائل میں اضافے کا باعث بن رہی ہے اور اسپتالوں میں ایسے کیسز کی تعداد میں مسلسل اضافہ ہو رہا ہے۔