بھابی یہ نیلا ڈرم رکھ لو بعد میں کام آئےگا، شادی میں دوستوں نے دیا انوکھا تحفہ (ویڈیو وائرل)

لکھنؤ: اتر پردیش کے ضلع ہمیرپور میں ایک شادی اس وقت سوشل میڈیا پر موضوعِ بحث بن گئی، جب دلہا کے دوستوں نے اُسے نیلے رنگ کا پلاسٹک ڈرم تحفے میں دے دیا۔ اس انوکھے تحفے کو دیکھ کر دلہا حیران و پریشان رہ گیا، جبکہ دلہن ہنسی سے لوٹ پوٹ ہو گئی۔ سوشل میڈیا پر اس واقعے کی ویڈیوز اور تصاویر خوب وائرل ہو رہی ہیں، اور صارفین دلچسپ تبصرے بھی کر رہے ہیں۔

ایک صارف نے لکھا، "دلہا تو تحفہ دیکھ کر پسینے پسینے ہو گیا، جبکہ دلہن کی ہنسی رکنے کا نام ہی نہیں لے رہی۔” ایک اور صارف نے مزاحیہ انداز میں لکھا، "ہاں بھائی، اب آیا اصل مزہ!” تیسرے نے لکھا، "ارے بھائی! چاہتے کیا ہو آخر؟”

اگرچہ نیلا ڈرم تحفے میں دینا بظاہر ایک مزاحیہ حرکت لگتی ہے، لیکن اس کی پسِ منظر ایک سنجیدہ معاملے سے جڑی ہے۔ رواں سال 2025 میں اتر پردیش کے میرٹھ ضلع میں ساؤرَب قتل کیس میں مقتول کی لاش کے ٹکڑوں کو نیلے پلاسٹک کے ڈرم میں بند کر کے چھپایا گیا تھا۔

 اس واقعے نے پورے ملک کو ہلا کر رکھ دیا تھا، اور تب سے نیلا ڈرم ایک سنجیدہ اور خوفناک علامت کے طور پر جانا جاتا ہے۔یہ واقعہ ہمیرپور ضلع کے رٹھ کوتوالی کے مَنگرَول گاؤں کے رہائشی شیلندر راجپوت کی شادی کا ہے، جن کا نکاح ریہونٹا گاؤں کی سیما کے ساتھ طے پایا تھا۔

 شادی کی تقریب رٹھ قصبے کے ایک میرج گارڈن میں منعقد ہوئی۔ جب دلہا اور دلہن جَے مالا کے بعد اسٹیج پر بیٹھے تھے، تو دلہا کے چند دوست ایک بڑا نیلا ڈرم اٹھا کر اسٹیج پر پہنچے اور اُسے تحفے میں دے دیا۔تحفہ دیکھ کر دلہا الجھن میں پڑ گیا، جبکہ دلہن زور زور سے ہنسنے لگی۔ باراتی بھی یہ نظارہ دیکھ کر حیران رہ گئے۔

اس انوکھے لمحے کا ویڈیو کسی نے ریکارڈ کر کے سوشل میڈیا پر شیئر کر دیا، جو تیزی سے وائرل ہو گیا ہے۔ ویڈیو میں صاف دیکھا جا سکتا ہے کہ دلہا اور دلہن اس تحفے پر کیسے ردعمل دے رہے ہیں، اور مجمع کس طرح لطف اندوز ہو رہا ہے۔