50 کروڑ کے منی لانڈرنگ کیس میں آئی پیک ڈائریکٹر 10 روزہ ای ڈی ریمانڈ پر

نئی دہلی: انفورسمنٹ ڈائریکٹوریٹ (ای ڈی) کی جانب سے پیر کی رات دیر گئے گرفتار کیے گئے انڈین پی اے سی کنسلٹنگ پرائیویٹ لمیٹڈ کے ڈائریکٹر ونیش چندیل کو 50 کروڑ روپے کے منی لانڈرنگ کیس میں 10 دن کے لیے حراستی ریمانڈ پر بھیج دیا گیا ہے۔

ای ڈی نے منی لانڈرنگ کی روک تھام کے ایکٹ (پی ایم ایل اے) کے تحت اپنی تحقیقات کا آغاز دہلی پولیس کی جانب سے درج کردہ ایف آئی آر کی بنیاد پر کیا۔ اب تک کی تحقیقات میں انڈین پیک کنسلٹنگ پرائیویٹ لمیٹڈ کی جانب سے مالی بے ضابطگیوں اور منی لانڈرنگ کے مختلف طریقوں کے متعدد واقعات سامنے آئے ہیں۔

ان میں دستاویزی اور غیر دستاویزی فنڈز کی وصولی، معتبر کاروباری ثبوتوں کے بغیر غیر محفوظ قرضے، فرضی بلوں اور رسیدوں کا اجرا، تیسرے فریق سے فنڈز کی وصولی، اور بین الاقوامی حوالہ نیٹ ورکس سمیت حوالہ چینلز کے ذریعے نقدی کی منتقلی شامل ہے۔

مزید تحقیقات سے اشارہ ملتا ہے کہ کمپنی کروڑوں روپے کی غیر قانونی کمائی کو قانونی شکل دینے میں ملوث تھی، جس میں اب تک تقریباً 50 کروڑ روپے کا سراغ لگایا جا چکا ہے۔ تفتیش کے دوران ان لین دین سے وابستہ مختلف افراد کے بیانات قلمبند کیے گئے۔ تلاشی کی کارروائیوں کے دوران مجرمانہ مواد بھی برآمد ہوا ہے، جس میں ونیش چندیل کا کردار واضح طور پر سامنے آیا ہے۔

متعلقہ قانونی دفعات کے تحت، کسی کمپنی کے ڈائریکٹرز کو ذمہ دار ٹھہرایا جا سکتا ہے اگر جرم ان کی رضامندی، ملی بھگت یا غفلت کی وجہ سے ہوا ہو۔ گرفتاری کے بعد چندیل کو عدالت میں پیش کیا گیا، جہاں سماعت پیر کی رات سے منگل کی صبح سویرے تک جاری رہی۔ پٹیالہ ہاؤس کورٹ کی ایڈیشنل سیشن جج شیفالی برنالا ٹنڈن نے ای ڈی کو ملزم کی 10 روزہ تحویل کا حکم دے دیا۔ مزید تفتیش جاری ہے۔