جماعت اسلامی ہند کا کل ہند اجتماع ارکان: "عدل و قسط” کے مرکزی عنوان کے تحت سہ روزہ اجتماع

حیدرآباد: جماعت اسلامی ہند کی جانب سے 15 تا 17 نومبر 2024 کو حیدرآباد کے وادی ہدیٰ گراؤنڈ، پہاڑی شریف میں کل ہند اجتماع ارکان کا انعقاد کیا جا رہا ہے۔

یہ اجتماع جماعت کے 15 ہزار ارکان اور ایک ہزار سے زائد افراد خانہ کی شرکت کی توقع کے ساتھ منعقد ہوگا۔ اس اجتماع کے دوران تقریباً 1500 سے زائد رضاکاروں کی ٹیم معیاری انتظامات اور سہولتوں کی فراہمی کے لیے خدمات انجام دے گی۔

ناظم اجتماع جناب عبد الجبار صدیقی نے میڈیا سے بات کرتے ہوئے کہا کہ "جماعت اسلامی ہند 75 سال سے زائد عرصے سے ملک و ملت کی فلاح اور عدل و قسط کے قیام کی جدوجہد کر رہی ہے۔

جماعت نے ہمیشہ وابستگان اور عوام کی تربیت کے لیے مختلف اجتماعات کا انعقاد کیا ہے۔” اس اجتماع کی قیادت جماعت کے امیر سید سعادت اللہ حسینی کے زیر نگرانی ہوگی۔

اجتماع کا مرکزی موضوع: "عدل و قسط”

اجتماع کا مرکزی موضوع "عدل و قسط” ہے، جس پر مختلف علمی، فکری اور اخلاقی موضوعات پر گفتگو کی جائے گی۔ جماعت کے نائب امیر جناب ایس امین الحسن نے اس بات پر زور دیا کہ یہ اجتماع تحریکی مقاصد سے وابستگی، قیام عدل کے لیے جذبہ ایثار، فکری ہم آہنگی اور باہمی محبت میں اضافہ کرے گا۔

ادراک تحریک شوکیس اور تجارتی نمائش

اجتماع میں ایک منفرد نمائش "ادراک تحریک شوکیس” کا اہتمام کیا جا رہا ہے، جس میں دعوت دین، اسلامی معاشرے کی تعمیر اور عدل و قسط کے قیام کی جدوجہد سے متعلق کامیاب پروجیکٹس کی نمائش کی جائے گی۔ اس کے علاوہ 14 تا 18 نومبر "بزنس ایکسپو” بھی منعقد ہوگی، جس میں ملک بھر سے تجارتی ادارے شریک ہوں گے۔

خصوصی اجلاس

16 نومبر کو شام 6:30 بجے ایک خصوصی اجلاس بھی منعقد کیا جائے گا جس میں اراکین جماعت، کارکنان، متفقین اور ہمدردان تحریک کو شرکت کی دعوت دی گئی ہے۔ اس اجلاس میں تلنگانہ، مہاراشٹر اور کرناٹک سے تقریباً 10 ہزار افراد کی شرکت متوقع ہے۔

تفصیلات:

تاریخ: 15 تا 17 نومبر 2024
مقام: وادی ہدیٰ گراؤنڈ، پہاڑی شریف، حیدرآباد
نمائش: 14 تا 18 نومبر 2024
خصوصی اجلاس: 16 نومبر، شام 6:30 بجے

جاری کردہ:
محمد سلمان
نیشنل اسسٹنٹ سکریٹری، شعبہ میڈیا، جماعت اسلامی ہند
موبائل: 7290010191
پتہ: ڈی 321، ابو الفضل انکلیو، جامعہ نگر، اوکھلا، نئی دہلی