جرمنی میں مہوا موئترا اور پناکِی مشرا کی شادی، رقص کی ویڈیو وائرل
جرمنی میں منعقدہ ایک نجی شادی کی تقریب کے دوران ترنمول کانگریس کی معروف رکن پارلیمنٹ مہوا موئترا اور بیجو جنتا دل (بی جے ڈی) کے سابق رکن پارلیمنٹ پناکِی مشرا کی رقص کرتی ہوئی ویڈیو سوشل میڈیا پر وائرل ہوگئی ہے۔
دہلی: جرمنی میں منعقدہ ایک نجی شادی کی تقریب کے دوران ترنمول کانگریس کی معروف رکن پارلیمنٹ مہوا موئترا اور بیجو جنتا دل (بی جے ڈی) کے سابق رکن پارلیمنٹ پناکِی مشرا کی رقص کرتی ہوئی ویڈیو سوشل میڈیا پر وائرل ہوگئی ہے۔ اس ویڈیو نے سیاسی حلقوں سمیت عام صارفین کی بھی توجہ حاصل کی ہے۔
30 مئی کو جرمنی میں مہوا موئترا اور پناکِی مشرا نے رشتۂ ازدواج میں منسلک ہونے کا اعلان کیا۔ اس موقع پر ایک مختصر اور نجی تقریب منعقد کی گئی، جس میں قریبی دوستوں اور افرادخاندان نے شرکت کی۔ اسی تقریب میں دونوں کو خوشی خوشی رقص کرتے دیکھا گیا، جس کی ویڈیو اب سوشل میڈیا پر خوب گردش کر رہی ہے۔
مہوا موئترا کی یہ دوسری شادی ہے۔ اس سے قبل وہ ڈنمارک کے ایک مالیاتی ماہر، لارس برورسن سے رشتہ ازدواج میں منسلک تھیں۔ موئترا نے اپنی پیشہ ورانہ زندگی کا آغاز سرمایہ کاری بینکر کے طور پر کیا اور بعد ازاں سیاست میں قدم رکھا۔ وہ 2019 میں پہلی بار لوک سبھا کے لیے منتخب ہوئیں اور تب سے مسلسل دو مرتبہ پارلیمنٹ کی رکن رہ چکی ہیں۔
پناکِی مشرا، جو کہ ایک سینئر سیاستدان اور بیجو جنتا دل کے اہم چہرے رہے ہیں، اس سے قبل سنگیتا مشرا سے رشتہ ازدواج میں بندھے ہوئے تھے، جن سے ان کے دو بچے بھی ہیں۔ وہ اڈیشہ کے مشہور لوک سبھا حلقہ، پوری کی نمائندگی کر چکے ہیں۔
مہوا موئترا نے شادی کے بعد سوشل میڈیا پلیٹ فارم "ایکس” پر ایک خوبصورت تصویر شیئر کی، جس میں وہ اور پناکِی مشرا شادی کے کیک کے ساتھ نظر آ رہے ہیں۔ انہوں نے اپنے پیغام میں لکھا:
"پیار اور نیک خواہشات کے لیے آپ سب کا شکریہ!! میں بہت شکر گزار ہوں۔”
اس اعلان کے بعد مختلف سیاسی قائدین اور سوشل میڈیا صارفین نے اس نئے جوڑے کو مبارکباد دی اور ان کی نئی زندگی کے لیے نیک تمناؤں کا اظہار کیا۔
