غزہ میں امداد تقسیم کرنے والی ٹیم پر اسرائیل کی بمباری، 23 فلسطینی شہید
اسرائیلی فوج کی جانب سے کیمپ میں 3 منزلہ رہائشی عمارت پر بمباری کی گئی تھی، حملے میں زخمی ہونے والوں کو دیر البلاح کے الاقصی شہداء اسپتال لے جایا گیا ہے۔
غزہ: غزہ میں امدادی تقسیم کرنے والی ٹیم پر اسرائیلی فضائی حملے میں کم از کم 23 افراد شہید ہو گئے۔وفا نیوز ایجنسی نے مقامی ذرائع کا حوالہ دیتے ہوئے بتایا کہ وسطی غزہ میں نصیرات پناہ گزین کیمپ پر اسرائیلی فضائی حملے میں مرنے والوں کی تعداد 27 ہو گئی ہے۔
قبل ازیں اسرائیلی فوج کی جانب سے کیمپ میں 3 منزلہ رہائشی عمارت پر بمباری کی گئی تھی، حملے میں زخمی ہونے والوں کو دیر البلاح کے الاقصی شہداء اسپتال لے جایا گیا ہے۔
امریکی وزیر خارجہ انٹونی بلنکن کا کہنا ہے کہ غزہ کی آبادی اب 100 فیصد‘شدید خوراک کے عدم تحفظ’کا شکار ہے، تاریخ میں اس طرح کی یہ پہلی مثال ہے۔
رائٹرز کی رپورٹ کے مطابق وائٹ ہاؤس کی ترجمان کرائن جین پیئر نے غزہ میں قحط کی خبروں کے بارے میں گہری تشویش کا حوالہ دیتے ہوئے کہا ہے کہ امریکی اور اسرائیلی حکام ممکنہ طور پر اگلے ہفتے کے اوائل میں واشنگٹن میں ملاقات کریں گے جس میں رفح میں اسرائیلی فوجی آپریشن پر بات چیت ہوگی۔
جین پیئر نے کہا کہ صدر جو بائیڈن نے اسرائیلی وزیر اعظم بنجمن نیتن یاہو سے کہا ہے کہ وہ ملٹری، انٹیلی جنس اور انسانی ہمدردی کے حکام کی ایک سینئر ٹیم کو بات چیت کے لیے واشنگٹن بھیجیں۔اے پی کے بموجب سوگواروں نے چہارشنبہ کی صبح وسطی غزہ کے ایک دواخانہ کے باہر28افراد کی نمازجنازہ ادا کی۔
یہ لوگ پچھلی رات شہری پناہ گزیں کیمپوں پر اسرائیل کے علٰحدہ فضائی حملوں میں جاں بحق ہوئے تھے۔ امریکی نیوزایجنسی اسوسی ایٹیڈ پریس کے فوٹیج میں دیکھاجاسکتا ہے کہ سوگوار نمازجنازہ ادا کررہے ہیں۔ بعدازاں میتوں کو تدفین کیلئے خچرگاڑیوں میں لے جایاگیا۔
غزہ میں لڑائی شدت اختیارکرچکی ہے۔ اسرائیلی وزیراعظم بنیامن نتن یاہو کا کہنا ہے کہ وہ رفح میں زمینی حملہ کرکے رہیں گے حالانکہ امریکی صدر جوبائیڈن انہیں اس سے منع کررہے ہیں۔ قبل ازیں قطری عہدیداروں نے کہا کہ وہ دوحہ میں اسرائیلی انٹلیجنس سربراہ کے ساتھ بات چیت کے سلسلہ میں محتاط طور پر پُرامید ہیں۔
قطری وزارتِ خارجہ کے ترجمان ماجد الانصاری نے منگل کے دن کہاتھا کہ رفح میں اسرائیل کی زمینی فوجی کاروائی کسی بھی بات چیت کیلئے دھکہ ثابت ہوگی۔ غزہ کی وزارت صحت کے بموجب تاحال جاں بحق فلسطینیوں کی تعداد31,819ہوگئی ہے۔ اقوام متحدہ کی فوڈ ایجنسی نے خبردار کیا ہے کہ شمالی غزہ میں قحط یقینی دکھائی دیتا ہے۔
