راہول گاندھی نے نفرت کی ’ بیلون‘ کو پنکچر کردیا: طارق انور
طارق انور نے کہاکہ ہندوستان اور کانگریس دونوں کی تاریخ کو لوگوں کو پڑھنا چاہئے۔ انہوں نے کہاکہ ہمیں اس بات کی خوشی ہے کہ آج کے ایم خان کو یاد کیا جارہا ہے، جنہوںنے فرقہ وارانہ ہم آہنگی کیلئے شاندار کام کیا ہے۔

نئی دہلی: کانگریس پارٹی کے قومی جنرل سکریٹری اور سابق مرکزی وزیر طارق انور نے کہاکہ جو لوگ کانگریس پارٹی پر سوال کھڑا کرتے ہیں وہ ہندوستان اور کانگریس دونوں کی تاریخ سے ناواقف ہیں۔
انہوں نے کہاکہ کانگریس پارٹی نے ملک کیلئے بھی قربانیاں دیں اور آزادی کے بعد بھی کانگریس کے لوگوں نے ملک کو متحد رکھنے کیلئے قربانی دی اور راہل گاندھی نے جو جدوجہد کی ہے ،اس کی بنیاد پر لوگ یہ کہہ رہے ہیں کہ ہم نے گاندھی کو تو نہیں لیکن راہل گاندھی کو ضرور دیکھا ہے ۔
یہاں کانسٹی ٹیوشن کلب میں کے ایم خان( سابق رکن پارلیمنٹ ) میموریل لیکچر سے خطاب کرتے ہوئے مسٹر طارق انور نے کہاکہ کانگریس کی تاریخ قربانیوں سے عبارت ہے اور اس پر کسی کو شک نہیں ہونا چاہئے۔
انہوںنے کہاکہ ہندوستان اور کانگریس دونوں کی تاریخ کو لوگوں کو پڑھنا چاہئے۔ انہوں نے کہاکہ ہمیں اس بات کی خوشی ہے کہ آج کے ایم خان کو یاد کیا جارہا ہے، جنہوںنے فرقہ وارانہ ہم آہنگی کیلئے شاندار کام کیا ہے۔
اس موقع پر اتراکھنڈ کے سابق وزیراعلیٰ ہریش راوت نے بیڑی و دیگر ملازمین کیلئے کے ایم خان کی قربانیوں کو یاد کرتے ہوئے کہا کہ وہ کانگریس پارٹی کے ایسے سپاہی تھے جن کی گرفت زمین پر تھی۔
اور ہمیں خوشی ہے کہ ان کے فرزند اے ایم خان بھی انہی کے راستے پر چل رہے ہیں، جن کے والد نے ہندوستان اور عرب کے رشتوں میںمضبوطی لانے کافی کا کام کیا ۔
واضح رہے کہ اے ایم خان اور آل انڈیا قومی تنظیم دہلی کے ورکنگ صدر عقیل سمیع سلمانی نے مشترکہ طرو پر اس پروگرام کا اہتمام کیا تھا۔
سابق رکن پارلیمنٹ آنند بھاسکر نے اپنے بیان میں کہاکہ ہمارے لئے ضروری ہے کہ ہم اپنے آبا و اجداد کی قربانیوں کو یاد کریں ۔ انہوںنے کہاکہ آج جھوٹ پروسا جارہا ہے ،جبکہ کے ایم خان کی پوری زندگی ہی جھوٹ اور فریب کیخلاف جدوجہد میں گزری تھی۔ انہوں نے کہاکہ ہمارے لئے ضروری ہے کہ ہم سبھی طبقات کیلئے کام کریں اور اگر کسی کے ساتھ نا انصافی ہوئی ہے تو اس کا زیادہ خیال رکھیں۔
آندھراپردیش سے سابق رکن پارلیمنٹ ہنومنت راو نے اپنے اپنے صدارتی خطبے میں کے ایم خان کے ذریعہ مزدوروں ، ایف سی آئی اور ریلوے ملازمین کیلئے ان کی جدوجہد کو یاد کرتے ہوئے کہاکہ ہمارے لئے ضروری ہے کہ ہم ان کے بتائے ہوئے راستہ پر چلیں۔
انہوں نے راہول گاندھی کی محبت کی دوکان کی ستائش کرتے ہوئے کہاکہ اس کا آج بہت شاندار اثر دیکھنے کو مل رہا ہے اورلوگ اس کی کافی ستائش بھی کرر ہے ہیں ۔ انہوں نے یقین دلایا کہ نفرت ہارے گی اور محبت کی جیت ہوگی ۔
اے ایم خان، ارشد شیخ، عقیل سلمانی، حاجی قمرالدین ، قومی سکریٹری آل انڈیا قومی تنظیم، شاہد صدیقی، ارسان علی گڑھ، ساجد ایڈوکیٹ بھوپال ، حاجی رئیس سلمانی ، محبوب سلمانی ، پپو پردھان سمیت متعدد لوگوں نے اس پروگرام کو خطاب کیا، جبکہ کشتی کھلاڑی رضیہ بانو سمیت سیکڑوں کی تعداد میں لوگ موجود تھے۔