حیدرآباد میں ایس آئی آر ڈیجیٹائزیشن میں تیزی، چندرائن گٹہ سرفہرست

حیدرآباد: حیدرآباد ضلع میں اسپیشل انٹینسیو ریویژن (SIR) کے تحت ووٹر اندراج فارموں (Enumeration Forms) کی ڈیجیٹائزیشن کا عمل تیزی سے جاری ہے۔

 جمعہ کی صبح 10 بجے تک جاری ہونے والی تازہ اسٹیٹس رپورٹ کے مطابق ضلع بھر میں مجموعی طور پر 47 لاکھ 36 ہزار 559 ووٹرز میں سے 15 لاکھ 51 ہزار 320 ووٹرز کے اینومریشن فارم ڈیجیٹائز کیے جا چکے ہیں، جس کے ساتھ ضلع میں مجموعی ڈیجیٹائزیشن کی شرح 32.75 فیصد تک پہنچ گئی ہے۔

رپورٹ کے مطابق چندرائن گٹہ اسمبلی حلقہ 40.72 فیصد ڈیجیٹائزیشن کے ساتھ پہلے نمبر پر ہے، جہاں 3 لاکھ 77 ہزار 300 ووٹرز میں سے ایک لاکھ 53 ہزار 638 افراد نے اپنے فارم جمع کرا کر ڈیجیٹائزیشن مکمل کروائی، جبکہ کاروان اسمبلی حلقہ 35.95 فیصد کے ساتھ دوسرے مقام پر رہا، جہاں 3 لاکھ 83 ہزار 910 ووٹرز میں سے ایک لاکھ 37 ہزار 754 فارم ڈیجیٹائز کیے جا چکے ہیں۔

 جی ایچ ایم سی کے الیکشن ونگ کے ایک سینئر عہدیدار کے مطابق شہریوں کی جانب سے اینومریشن فارم جمع کرانے کا عمل مسلسل جاری ہے اور آئندہ دنوں میں اس رفتار میں مزید اضافہ متوقع ہے۔ رپورٹ میں بتایا گیا ہے کہ حیدرآباد ضلع میں اب بھی ایک لاکھ 77 ہزار 222 ووٹرز ایسے ہیں جنہیں غیر حاضر، منتقل شدہ یا فوت شدہ (ASD) کے زمرے میں رکھا گیا ہے۔

ایسے ووٹرز اپنے متعلقہ پولنگ اسٹیشن کے بوتھ لیول آفیسر (BLO) سے رابطہ کرکے اینومریشن فارم حاصل کر سکتے ہیں، اسے مکمل کرکے 3 اگست تک جمع کرا سکتے ہیں۔ حکام نے ووٹرز سے اپیل کی ہے کہ وہ آخری تاریخ کا انتظار کرنے کے بجائے جلد از جلد فارم جمع کرائیں تاکہ ان کا حقِ رائے دہی محفوظ رہ سکے۔

دوسری جانب، تلنگانہ کے چیف الیکٹورل آفیسر (CEO) کی رپورٹ کے مطابق 16 جولائی تک حیدرآباد ضلع میں ڈیجیٹائزیشن کی شرح 31.54 فیصد، میڑچل-ملکاجگری ضلع میں 28.41 فیصد اور رنگا ریڈی ضلع میں 41.46 فیصد ریکارڈ کی گئی۔ حیدرآباد کے دیگر اسمبلی حلقوں میں نمپلی 36.43 فیصد، بہادر پورہ 35.64 فیصد، سکندرآباد 34.04 فیصد، گوشہ محل 33.47 فیصد، خیرت آباد 32.54 فیصد، چارمینار 31.85 فیصد، جوبلی ہلز 30.80 فیصد، صنعت نگر 30.54 فیصد، کینٹونمنٹ 30.33 فیصد، ملک پیٹ 29.90 فیصد، یاقوت پورہ 29.85 فیصد، امبرپیٹ 28.37 فیصد اور مشیرآباد 27.69 فیصد ڈیجیٹائزیشن کے ساتھ شامل ہیں، جبکہ چندرائن گٹہ بدستور سب سے آگے ہے۔