آن لائن ٹریڈنگ اورسرمایہ کاری کے نام پر 1.62کروڑکا دھوکہ، تین افراد گرفتار

حیدرآباد: آن لائن ٹریڈنگ اور سرمایہ کاری کے نام پر زیادہ منافع کا لالچ دے کر تقریباً 1.62 کروڑ روپے کا دھوکہ دینے والے تین افراد کو تلنگانہ کی کھمم سائبر کرائم پولیس نے آندھرا پردیش کے وجئے واڑہ سے گرفتار کر لیا۔

یہ بات کھمم پولیس کمشنر سنیل دت نے بتائی۔تفصیلات کے مطابق بونکل منڈل، ضلع کھمم سے تعلق رکھنے والے ایک سافٹ ویئر انجینئر کو فون کر کے آن لائن سرمایہ کاری میں زیادہ منافع کا لالچ دیا گیا۔

واٹس ایپ اور دیگر ٹریڈنگ لنکس کے ذریعے اسے دھوکہ دے کر 1.62 کروڑ روپے کی رقم حاصل کی گئی۔

تحقیقات کے دوران معلوم ہوا کہ اس رقم میں سے کچھ ایک مخصوص بینک اکاؤنٹ میں منتقل ہوئی تھی جس پر پولیس نے 38 سالہ شیخ سبحانی کو گرفتار کیا۔

جانچ میں انکشاف ہوا کہ یہ دھوکہ دہی اس نے 37 سالہ داسری سنیل کمار اور 30 سالہ سائی کرشنا کے ساتھ مل کر کیا تھی۔تینوں کو آندھرا پردیش کے ضلع این ٹی آر کے شہر وجئے واڑہ سے گرفتار کیا گیا۔ بعد ازاں انہیں کھمم سائبر کرائم کورٹ میں پیش کر کے عدالتی تحویل میں بھیج دیا گیا۔