ملعون راجہ سنگھ کی گرفتاری کیخلاف گوشہ محل بند
زعفرانی جماعت سے معطل ملعون رکن اسمبلی کے حامیوں نے اس کی رہائی کا مطالبہ کرتے ہوئے گوشہ محل اسمبلی حلقہ میں بند منایاجس کے پیش نظر دکانات اور تجارتی ادارے بند رہے۔
حیدرآباد: محسن انسانیت حضوراکرمؐ کی شان اقدس میں گستاخی کرنے والے بی جے پی کے رکن اسمبلی راجہ سنگھ کی رہائی کامطالبہ کرتے ہوئے آج گوشہ محل اسمبلی حلقہ میں بند منایاگیا۔ملعون راجہ سنگھ جو اس حلقہ کی اسمبلی میں نمائندگی کرتا ہے، فی الحال چرلہ پلی جیل میں محروس ہے۔
اس جیل میں اس کی سیکوریٹی میں اضافہ کردیاگیا ہے اور اس کے بیریک کو بھی سیکوریٹی وجوہات کی بنا پر بدل دیاگیا ہے۔زعفرانی جماعت سے معطل ملعون رکن اسمبلی کے حامیوں نے اس کی رہائی کا مطالبہ کرتے ہوئے گوشہ محل اسمبلی حلقہ میں بند منایاجس کے پیش نظر دکانات اور تجارتی ادارے بند رہے اور پولیس نے سختی چوکسی اختیار کرتے ہوئے سیکوریٹی میں اضافہ کردیاہے۔
ایک اور تنظیم سری رام سینا نے بھی اس بند کی اپیل کی تھی اور اس کے خلاف پی ڈی ایکٹ لگائے جانے کی مذمت کی تھی۔پولیس نے اس کو گستاخانہ ریمارکس پر 23اگست کو گرفتار کیاتھا اور 14ویں ایڈیشنل چیف میٹروپولیٹن مجسٹریٹ نامپلی کریمنل کورٹ کے سامنے پیش کیا تھا۔
تاہم جج نے اس کی ریمانڈ کی پولیس کی درخواست کو مسترد کردیاتھا اور گرفتاری کے سلسلہ میں درکار مناسب طریقہ کار اختیار نہ کرنے پر اس کو رہا کرنے کا حکم دیاتھا۔پولیس نے تاہم 25اگست کو دو دیگرزیرالتوا معاملات میں اس کو نوٹس دی اور پھر گرفتار کیا تھا۔
پولیس نے اس کے خلاف پی ڈی ایکٹ بھی لگایاتھا۔اس کی گرفتاری کی مذمت کرتے ہوئے اس کے حامیوں اور سری رام سینا کے بند کے پیش نظر گوشہ محل، منگل ہاٹ اور اطراف کے علاقوں میں دکانات اور تجارتی ادارے بند رہے۔پولیس نے بند کے پیش نظر ان علاقوں میں سیکوریٹی سخت کردی ہے۔
ساتھ ہی پولیس نے انتباہ دیا کہ زبردستی طورپر دکانات بند کروانے پر کارروائی کی جائے گی۔پولیس نے گنیش فیسٹیول کو دیکھتے ہوئے پہلے ہی شہر کے مختلف مقامات بالخصوص حساس مقامات پر سیکوریٹی میں اضافہ کردیا ہے۔راجہ سنگھ کے خلاف 101فوجداری معاملات زیرالتوا ہیں۔
