امریکی صدرجوبائیڈن کے دانتوں میں درد

واشنگٹن: امریکی صدر جو بائیڈن کو دانت میں درد کا سامنا کرنے کے بعد گزشتہ دو روز میں دوسری مرتبہ روٹ کینال کے علاج سے گزرنا پڑا۔

وہائٹ ہاوس نے بتایا کہ دانت میں تکلیف کے سبب امریکی صدر کی ایک تقریب منسوخ کردی گئی۔ بائیڈن کے ڈاکٹر نے صحافیوں کوبتایا کہ امریکی صدر کو اتوار کو دانت میں درد محسوس ہوا، جس کی وجہ سے ان کی طبی ٹیم نے ان کا معائنہ کیا اور ان کا علاج کیا۔

پیر کی صبح امریکی صدر کو پھر دانتوں میں درد ہوا۔ ڈاکٹر کیون او کونر نے بتایا کہ اس صورت حال میں ان کی طبی ٹیم نے فیصلہ کیا کہ صدر کا اینڈوڈونٹک علاج پیر کو بھی وائٹ ہاؤس میں جاری رکھا جائے گا۔

دانت کے درد کے علاج کے سلسلہ میں وائٹ ہاؤس نے آج کالج کے ایتھلیٹس کی ایک تقریب میں بائیڈن کی شرکت منسوخ کردی۔