چیف منسٹر پنجاب کی قیامگاہ کے قریب بم دستیاب

چندی گڑھ: چیف منسٹر پنجاب بھگونت مان کی چندی گڑھ میں واقع قیامگاہ کے قریب آج ایک مشتبہ شئے پائی گئی۔ اسے دھماکوشئے سمجھاجارہاہے۔

ایک بم ڈسپوزل اسکواڈکو فوری جائے واقعہ پر روانہ کیاگیاجو چیف منسٹر پنجاب کے زیر استعمال ہیلی پیاڈکے قریب ہے۔ ہندوستانی فوج کی ویسٹرن کمانڈ کوبھی تحقیقات میں شامل کرلیاگیاہے۔

4تا4:30 بجے دن کے درمیان ایک ٹیوب ویل آپریٹرنے ہیلی پیاڈ کے قریب آم کے باغ میں اس بم کو دیکھا۔ اس وقت بھگونت مان اپنی قیامگاہ پر نہیں تھے جووہاں سے بمشکل ایک کیلومیٹرکے فاصلہ پر واقع ہے۔

چندی گڑھ کے انتظامیہ نے کہاہے کہ دفاعی افواج اس بات کی تحقیقات کریں گی کہ یہ بم کہاں سے آیا۔ چندی گڑھ انتظامیہ کے نوڈل آفیسر کلدیپ کوہلی نے بتایاکہ ہمیں یہ اطلاع ملی تھی کہ کچھ غیرمطلوب میٹریل یہاں پایاگیا۔

ہم نے جب تلاشی لی تو یہ کارآمد بم پایاگیا۔ ہم نے اسے حاصل کرلیاہے اورہماری تحقیقات میں شامل کرلیاگیاہے۔