رَیگنگ یا دہشت گردی؟ میڈیکل کالج سے افسوسناک ویڈیو وائرل
ویڈیو میں سینئرز کا رویہ انتہائی غیر سنجیدہ نظر آ رہا ہے۔ جب جونیئر طالبہ ثبوت بنانے کی بات کرتی ہے، تو سینئرز ہنستے ہوئے اسے چیلنج کرتے ہیں اور کہتے ہیں، "بنا لو یار (ویڈیو)، بنا لو۔" ایک سینئر طالبہ طنزیہ انداز میں کہتی ہے کہ "آج کل لوگ ہر بات پر شکایت کر دیتے ہیں۔"
پریاگ راج (یو پی): اتر پردیش کے قدیم اور معروف تعلیمی ادارے ‘موتی لال نہرو میڈیکل کالج’ سے رَیگنگ اور تشدد کا ایک سنگین معاملہ سامنے آیا ہے۔ سوشل میڈیا پر وائرل ہونے والی ایک ویڈیو نے میڈیکل کالج کے ہاسٹل میں جونیرس کے ساتھ ہونے والے ناروا سلوک اور جسمانی ہراساں کیے جانے کے الزامات کو ہوا دے دی ہے۔
وائرل ویڈیو میں دیکھا جا سکتا ہے کہ ایک جونیئر طالبہ ہمت دکھاتے ہوئے سینئرز کی بدسلوکی کو اپنے فون میں ریکارڈ کر رہی ہے۔ ویڈیو کے دوران طالبہ کو یہ کہتے ہوئے سنا جا سکتا ہے:
"دیدی، میں شکایت درج کرواؤں گی اور مجھے ثبوت چاہیے کہ آپ میرے ساتھ کیا کر رہی ہیں۔ آپ نے میری انگلی مروڑ دی ہے اور یہاں موجود سب کو پتہ ہے کہ آپ نے مجھ پر ہاتھ اٹھایا ہے۔”
طالبہ نے یہ الزام بھی لگایا کہ سینئرز نے ہاسٹل کی دیگر طالبات کو اس کے خلاف کھڑا کر رکھا ہے تاکہ اس پر ذہنی دباؤ ڈالا جا سکے۔
ویڈیو میں سینئرز کا رویہ انتہائی غیر سنجیدہ نظر آ رہا ہے۔ جب جونیئر طالبہ ثبوت بنانے کی بات کرتی ہے، تو سینئرز ہنستے ہوئے اسے چیلنج کرتے ہیں اور کہتے ہیں، "بنا لو یار (ویڈیو)، بنا لو۔” ایک سینئر طالبہ طنزیہ انداز میں کہتی ہے کہ "آج کل لوگ ہر بات پر شکایت کر دیتے ہیں۔” ویڈیو میں سینئرز کی جانب سے گروپ بنا کر جونیئرز کو ڈرانے دھمکانے کی جھلک بھی صاف دکھائی دے رہی ہے۔
سوشل میڈیا پر گردش کرنے والی رپورٹس کے مطابق، یہ کوئی پہلا واقعہ نہیں ہے۔ جونیئر طلبہ کا الزام ہے کہ سینئرز رات کے وقت جونیئرز کے فون چھین لیتے ہیں تاکہ وہ گھر والوں سے رابطہ نہ کر سکیں یا شکایت نہ کر سکیں۔
انہیں گھنٹوں کھڑا رکھا جاتا ہے اور ذہنی و جسمانی تشدد کا نشانہ بنایا جاتا ہے۔
شکایت کرنے پر سنگین نتائج بھگتنے کی دھمکیاں دی جاتی ہیں۔
ویڈیو وائرل ہونے کے بعد انٹرنیٹ صارفین نے سخت برہمی کا اظہار کیا ہے۔ ٹویٹر (X) پر صارفین نے یوپی کے وزیر اعلیٰ یوگی آدتیہ ناتھ، پریاگ راج پولیس اور ضلع مجسٹریٹ کو ٹیگ کرتے ہوئے مطالبہ کیا ہے کہ:
ملوث سینئرز کو فوری طور پر کالج سے نکالا جائے۔
رینگنگ کو جرم قرار دیتے ہوئے ذمہ داروں کے خلاف ایف آئی آر (FIR) درج کی جائے۔
میڈیکل کالج کی انتظامیہ کی خاموشی پر بھی سوالات اٹھائے جا رہے ہیں۔
فی الحال کالج انتظامیہ کی جانب سے اس واقعے پر کوئی باضابطہ بیان سامنے نہیں آیا ہے، تاہم پولیس کی جانب سے معاملے کی تحقیقات کی توقع کی جا رہی ہے۔
