تلنگانہ میں بس یاترا،سدارامیا اور شیوکمار مہما ن خصوصی

حیدرآباد: کرناٹک کے وزیراعلی سدارامیا اور نائب وزیراعلی ڈی کے شیوکمار، تلنگانہ میں ہونے والی بس یاترا میں مہمان خصوصی کے طورپر حصہ لیں گے۔

وہ اس یاترا کے دوران عوام کو یہ بتائیں گے کہ پڑوسی ریاست میں کانگریس کے برسراقتدارآنے کے بعد عوام سے کئے گئے انتخابی وعدوں پر کس طرح کامیابی کے ساتھ عمل کو یقینی بنایاجارہا ہے۔

یہ یاترا 28اکتوبرسے چیوڑلہ سے شروع ہوگی۔اس دوسرے مرحلہ کی وجئے بھیری یاترا کا آغازچیوڑلہ سے ہوگاجو ناگرکرنول ضلع کے کولاپورسے ہوتے ہوئے ناگرجناساگر تک جاری رہے گی۔

اس یاترا کے سلسلہ میں کانگریس کے مقامی لیڈران انتظامات میں مصروف ہیں۔یاترا کے دوسرے دن پارٹی کی جنرل سکریٹری پرینکاگاندھی اور آخری دن پارٹی کے سینئر لیڈرراہل گاندھی اس یاترا میں حصہ لیں گے۔

پڑوسی ریاست کرناٹک میں کانگریس کی کامیابی کے بعد تلنگانہ کے کانگریس کیڈرمیں کافی جوش وخروش پایاجاتا ہے۔