داڑھی منڈھوانے پر دارالعلوم دیوبند کے 4 طلبا کا اخراج

سہارنپور(یوپی): دارالعلوم دیوبند نے حکم جاری کیا ہے کہ طلبا داڑھی نہ منڈھوائیں۔ دارالعلوم کے شعبہ تعلیم کے انچارج مولانا حسین احمد نے پیر کے دن کہا کہ ادارہ میں زیرتعلیم کوئی بھی طالب ِ علم اپنی داڑھی نہ منڈھوائے۔ اگر اس نے ایسا کیا تو اسے ادارہ سے خارج کردیا جائے گا۔

اس کے علاوہ داڑھی منڈھواکر آنے والے طلبا کو ادارہ میں داخلہ نہیں دیا جائے گا۔ 6  فروری کو 4 طلبا کو اس لئے خارج کردیا گیا کہ وہ بے ریش ہوگئے تھے۔ ذرائع نے یہ بات بتائی۔ 3 دن قبل دارالعلوم دیوبند نے فتویٰ جاری کیا کہ اسلام میں داڑھی منڈھوانا حرام ہے۔

ربط پیدا کرنے پر آل انڈیا مسلم پرسنل لا بورڈ کے سینئر رکن اور قاضی ئ شہر لکھنو مولانا خالد رشید فرنگی محلی نے پی ٹی آئی سے کہا کہ رسول اللہ ﷺداڑھی رکھا کرتے تھے۔ اسلام میں داڑھی رکھنا سنت ہے۔ مذہب میں داڑھی کی بڑی اہمیت ہے۔ اگر کسی شخض نے داڑھی رکھ لی اور بعد میں وہ بے ریش ہوگیا تو وہ گناہ گار سمجھا جائے گا۔